ទីបញ្ជាការកណ្តាលរបស់សហរដ្ឋអាមេរិក ឬ CENTCOM បានឲ្យដឹងកាលពីថ្ងៃអាទិត្យថា មន្ត្រីជាន់ខ្ពស់ម្នាក់នៃសាខាក្រុមអាល់កៃដា ត្រូវបានសម្លាប់ ក្នុងអំឡុងពេលការវាយប្រហារតាមអាកាសដោយកងកម្លាំងអាមេរិក នៅភាគពាយព្យប្រទេសស៊ីរី។

នៅក្នុងសេចក្តីថ្លែងការណ៍មួយដែលបានបង្ហោះនៅលើវេទិកា X CENTCOM បាននិយាយថា៖ «ការវាយប្រហារតាមអាកាសយ៉ាងច្បាស់លាស់» បានកំណត់គោលដៅ និងសម្លាប់ «មន្ត្រីជាន់ខ្ពស់ហិរញ្ញវត្ថុ និង    ភ័ស្តុភារម្នាក់ នៅក្នុងអង្គការភេរវកម្ម Hurras al-Din (HaD) ដែលជាសាខារបស់ក្រុមអាល់កៃដា»។

សេចក្តីថ្លែងការណ៍ បានបញ្ជាក់ថា ប្រតិបត្តិការនេះ «គឺជាផ្នែកមួយនៃការប្តេជ្ញាចិត្តបន្តរបស់ CENTCOM រួមជាមួយនឹងដៃគូ ក្នុងតំបន់ ដើម្បីបង្អាក់ និងបំផ្លាញកិច្ចខិតខំប្រឹងប្រែងរបស់ក្រុមភេរវករ ក្នុងការរៀបចំផែនការ និងធ្វើការវាយប្រហារ» ប្រឆាំងនឹងជនស៊ីវិល និងបុគ្គលិកយោធាមកពីសហរដ្ឋអាមេរិក និងសម្ព័ន្ធមិត្តរបស់ខ្លួន។

សេចក្តីថ្លែងការណ៍នេះ បានដកស្រង់សម្តីប្រធាន CENTCOM លោកឧត្តមសេនីយ៍ Michael Erik Kurillaដែលបាននិយាយថា៖«យើងនឹងបន្តស្វែងរកភេរវករដោយមិនឈប់ឈរ ដើម្បីការពារមាតុភូមិរបស់យើង និងបុគ្គលិកសហរដ្ឋអាមេរិក សម្ព័ន្ធមិត្ត និងដៃគូ នៅក្នុងតំបន់»។

កាលពីថ្ងៃទី ៣០ ខែមករា កន្លងទៅ នៅក្នុងប្រទេសស៊ីរី មេដឹកនាំអង្គការ Hurras al-Din ក៏ត្រូវបានគេរាយការណ៍ថា បានស្លាប់ផងដែរ នៅក្នុងការវាយប្រហារតាមអាកាសរបស់យោធាអាមេរិក ដែលបានកំណត់គោលដៅ លើរថយន្តរបស់លោក នៅលើផ្លូវហាយវេមួយ ក្បែរភូមិ Batabo នៅភាគពាយព្យប្រទេសស៊ីរី។