ក្រុមសាក្សី និងក្រុមប្រដាប់អាវុធ និយាយថា ទីក្រុង Bukavu បន្តស្ងប់ស្ងាត់ ក្រោយក្រុមឧទ្ទាម M23 គាំទ្រដោយប្រទេសរ៉្វាន់ដា ដណ្តើមបានការគ្រប់គ្រងទីក្រុងនៅភាគខាងកើតរបស់កុងហ្គោមួយនេះ ដោយសារមានការទប់ទល់តិចតួចពីកងកម្លាំងរដ្ឋាភិបាល ។

រដ្ឋាភិបាលកុងហ្គោ បានចោទប្រកាន់ប្រទេសរ៉្វាន់ដាថា ពុំបានអើពើនឹងការអំពាវនាវឲ្យមានបទឈប់បាញ់ ប៉ុន្តែពួកគេពុំបានបញ្ជាក់នោះឡើយថាតើទីក្រុងមួយនេះ ត្រូវបានគ្រប់គ្រងទាំងស្រុងដោយក្រុមឧទ្ទាម M23 ឬយ៉ាងណានោះទេ ។

ក្រុមឧទ្ទាម បានព្យាយាមរឹបអូសយកទីក្រុងមជ្ឈមណ្ឌលពាណិជ្ជកម្មមួយនេះ ចាប់តាំងពីដណ្តើមបានទីក្រុង Goma កាលពីចុងខែមករា ។ ការគ្រប់គ្រងទីក្រុង Bukavu នឹងធ្វើឲ្យមានផលប៉ះពាល់បន្ថែមទៀតដល់សិទ្ធិអំណាចរបស់ក្រុង Kinshasa ស្ថិតនៅភាគខាងកើតប្រទេសកុងហ្គោ ។

ការរុលចូលយ៉ាងឆាប់រហ័សរបស់ក្រុមឧទ្ទាម M23ចាប់តាំងពីដើមឆ្នាំនេះរហូតមក ហើយនិងការជាប់ពាក់ព័ន្ធរបស់ទាហានមកពីប្រទេសជិតខាង បានធ្វើឲ្យមានក្តីបារម្ភដល់សង្រ្គាមក្នុងតំបន់ទ្រង់ទ្រាយធំជាងនេះ ដោយគាស់រំលើងភាពតានតឹងជុំវិញការដណ្តើមអំណាច អត្តសញ្ញាណ និងធនធានដែលមានតាំងពីរបបប្រល័យពូជសាសន៍រ៉្វាន់ដាទសវត្សរ៍ឆ្នាំ ១៩៩០មកម្ល៉េះ ។

កុងហ្គោដែលជាប្រទេសផលិតលោហៈធាតុគូប័ល(Cobalt)លំដាប់កំពូលរបស់ពិភពលោក និងជាប្រទេសផ្គត់ផ្គង់ស្ពាន់ដ៏សំខាន់នោះ ប្រឈមនឹងក្តីបារម្ភថ្មីពីផលប៉ះពាល់ដោយសារជម្លោះលើការនាំចេញរ៉ែសំខាន់ៗរបស់ខ្លួន ៕