កាលពីថ្ងៃអាទិត្យម្សិលមិញ សហភាពអាហ្វ្រិក បានជំរុញឲ្យក្រុមឧទ្ទាម M23 រំសាយអាវុធ ដើម្បីបញ្ចៀសសង្រ្គាមទ្រង់ទ្រាយធំជាងនេះ នៅសាធារណរដ្ឋប្រជាធិបតេយ្យកុងហ្គោ ស្របពេលដែលភាពវឹកវរបានកើតមាននៅទីក្រុងភាគខាងកើត Bukavu ក្រោយក្រុមឧទ្ទាមរុលទៅដល់ទីក្រុងមួយនេះ ។

ក្រុមឧទ្ទាម M23គាំទ្រដោយប្រទេសរ៉្វាន់ដា បានរុលទៅដល់តំបន់ភាគខាងត្បូងឆ្ពោះទៅកាន់ទីក្រុង Bukavu ដែលជាទីក្រុងធំបំផុតទី ២ ស្ថិតនៅភាគខាងកើតកុងហ្គោ ចាប់តាំងពីពួកគេរឹបអូសបានទីក្រុង Goma ដែលជាទីក្រុងធំបំផុតរបស់ប្រទេសមួយនេះ កាលពីខែមុន ។

ពួកគេបានធ្វើដំណើរទៅដល់តំបន់ជាយក្រុង Bagira ស្ថិតនៅភាគខាងជើងទីក្រុង Bukavu កាលពីយប់ថ្ងៃសុក្រ ហើយដណ្តើមបានមជ្ឈមណ្ឌលទីក្រុងមួយនេះ កាលពីព្រឹកថ្ងៃអាទិត្យ ។

លោក Bankole Adeoye គឺជាស្នងការសហភាពអាហ្វ្រិកទទួលបន្ទុកកិច្ចការនយោបាយ សន្តិភាព និងសន្តិសុខ បាននិយាយក្នុងសន្និសីទសារព័ត៌មាននៅទីក្រុង Addis Ababa ប្រទេសអេត្យូពីថា ពួកយើងមានការព្រួយបារម្ភខ្លាំងណាស់ដល់សង្រ្គាមបើកចំហរ និងក្នុងតំបន់នៅភាគខាងកើតកុងហ្គោ ។

លោកបន្តថា ពួកយើងសូមធ្វើការលើកឡើងជាថ្មីម្តងទៀតពីការប្រុងប្រយ័ត្ន និងតម្រូវការឲ្យក្រុមឧទ្ទាម M23 និងក្រុមគាំទ្ររបស់ពួកគេត្រូវរំសាយអាវុធ និងដកខ្លួនចេញពីអាកាសយានដ្ឋានក្រុង Goma និងដែនដីកាន់កាប់ផ្សេងទៀត ។

ស្ថានភាពមួយនេះ បានធ្វើឲ្យកើតមានក្តីបារម្ភថាតំបន់មួយនេះ អាចធ្លាក់ទៅក្នុងសង្រ្គមព្រំដែន ធ្វើឲ្យគេរំឭកដល់ជម្លោះក្នុងទសវត្សរ៍ឆ្នាំ ១៩៩០ និងឆ្នាំ ២០០០ដែលបានសម្លាប់មនុស្សរាប់លាននាក់ ៕