អ្នកនាំពាក្យក្រសួងការបរទេសចិន នៅថ្ងៃចន្ទ (ទី១៧ ខែកុម្ភៈ) នេះ បានប្រាប់ឲ្យដឹងថា ជំហររបស់សហរដ្ឋអាមេរិក ចំពោះបញ្ហាទាក់ទងនឹងកោះតៃវ៉ាន់ បាន «ដើរថយក្រោយយ៉ាងខ្លាំង» បន្ទាប់ពីក្រសួងការបរទេសអាមេរិកបានដកចេញនូវឯកសារយោង ពាក់ព័ន្ធនឹងឯករាជ្យរបស់កោះតៃវ៉ាន់ នៅក្នុងការធ្វើបច្ចុប្បន្នភាព ចំពោះបញ្ហាកោះតៃវ៉ាន់លើគេហទំព័ររបស់ខ្លួន។

គួរបញ្ជាក់ថា ក្រសួងការបរទេសអាមេរិកបានលុបចោលសេចក្តីថ្លែងការណ៍នៅលើគេហទំព័ររបស់ខ្លួន ដែលលើកឡើងថា ខ្លួនមិនគាំទ្រឯករាជ្យរបស់កោះតៃវ៉ាន់។ ចំណាត់ការនេះត្រូវបានស្វាគមន៍ដោយទីក្រុងតៃប៉ិ ប៉ុន្តែបានបង្កឲ្យមានការរិះគន់ខ្លាំងក្លាបំផុតពីទីក្រុងប៉េកាំង ចាប់តាំងពីលោក Donald Trump ត្រលប់ទៅកាន់សេតវិមាន។ ប្រទេសចិនអះអាងថា កោះគ្រប់គ្រងខ្លួនឯងដោយលទ្ធិប្រជាធិបតេយ្យមួយនេះ ជាដែនដីរបស់ខ្លួន។

នៅថ្ងៃចន្ទនេះ ក្រសួងការបរទេសចិន បានជំរុញឲ្យសហរដ្ឋអាមេរិក «កែតម្រូវកំហុសឆ្គងភ្លាមៗ» ជុំវិញការដកនោះ ឬបើមិនដូច្នោះទេ ប្រឈមនឹង «ការធ្វើឲ្យប៉ះពាល់យ៉ាងធ្ងន់ធ្ងរបន្ថែមទៀត» ដល់ទំនាក់ទំនងចិន-អាមេរិក ដែលកំពុងត្រូវបានសាកល្បងជាថ្មីម្តងទៀត ដោយការវិលត្រលប់មកអនុវត្តគោលនយោបាយ « America First» (អាមេរិកទី១) របស់រដ្ឋបាលលោក Trump។

អ្នកនាំពាក្យក្រសួង លោក Guo Jiakun បានលើកឡើងនៅក្នុងសន្និសីទសារព័ត៌មានប្រចាំថ្ងៃថា៖ «ការពិនិត្យឡើងវិញរបស់ក្រសួងការបរទេសសហរដ្ឋអាមេរិក អំពីបញ្ជីផ្លូវការ ទាក់ទងនឹងទំនាក់ទំនង រវាងសហរដ្ឋអាមេរិក និងកោះតៃវ៉ាន់ តំណាងឲ្យការដើរថយក្រោយយ៉ាងខ្លាំងក្លា នៅក្នុងជំហររបស់ខ្លួន ចំពោះកោះតៃវ៉ាន់ ហើយបញ្ជូនសារនាំឲ្យមានការភ័ន្តច្រឡំយ៉ាងធ្ងន់ធ្ងរដល់ក្រុមបំបែកខ្លួន ដែលកំពុងទាមទារឯករាជ្យឲ្យកោះតៃវ៉ាន់»។

អមដោយការព្រមានឲ្យទីក្រុងវ៉ាស៊ីនតោនដោះស្រាយបញ្ហាកោះតៃវ៉ាន់ដោយ «ប្រុងប្រយ័ត្នបំផុត» នោះ លោក Guo បានបន្ថែមថា៖ «នេះជាភស្តុតាងបន្ថែមទៀតនៃភាពរឹងរូសរបស់អាមេរិកដែលប្រកាន់ខ្ជាប់នូវគោលនយោបាយខុសឆ្គង ក្នុងការប្រើប្រាស់កោះតៃវ៉ាន់ ដើម្បីទប់ស្កាត់ប្រទេសចិន។ យើងជំរុញឲ្យសហរដ្ឋអាមេរិក កែតម្រូវកំហុសឆ្គងនេះជាបន្ទាន់»៕