​

វិមានក្រឹមឡាំង នៅថ្ងៃចន្ទ (ទី១៧ ខែកុម្ភៈ) នេះ បានប្រាប់ឲ្យដឹងថា ប្រធានាធិបតីរុស្ស៊ីលោក Vladimir Putin បានបញ្ជូនរដ្ឋមន្ត្រីការបរទេសរបស់លោក និងទីប្រឹក្សាជាន់ខ្ពស់វិមានក្រឹមឡាំង ទៅជួបមន្ត្រីអាមេរិក នៅក្នុងប្រទេសអារ៉ាប៊ីសាអ៊ូឌីត នាថ្ងៃអង្គារស្អែកនេះ ដើម្បីពិភាក្សាអំពីការស្តារទំនាក់ទំនងឡើងវិញ និងកិច្ចចរចាដែលអាចកើតមាន ដើម្បីបញ្ចប់សង្រ្គាម នៅអ៊ុយក្រែន។

កាលពីថ្ងៃពុធសប្ដាហ៍កន្លងមក បន្ទាប់ពីជជែកតាមទូរសព្ទជាមួយលោក Putin ប្រធានាធិបតីអាមេរិក លោក Donald Trump បាននិយាយថា ពួកលោកនឹងចាប់ផ្តើមកិច្ចពិភាក្សា ដែលមានគោលបំណងបញ្ចប់សង្រ្គាម នៅអ៊ុយក្រែនភ្លាមៗ ហើយថា ពួកលោកក៏បានពិភាក្សា អំពីតំបន់មជ្ឈិមបូព៌ា ថាមពល ប្រាក់ដុល្លារអាមេរិក និងបញ្ញាសិប្បនិម្មិត (AI) ផងដែរ។

រដ្ឋមន្ត្រីការបរទេសអាមេរិក លោក Marco Rubio គ្រោងនឹងជួបជាមួយមន្ត្រីរុស្ស៊ី រួមជាមួយលោក Mike Waltz ទីប្រឹក្សាសន្តិសុខជាតិរបស់លោក Trump និងលោក Steve Witkoff បេសកជនរបស់សេតវិមាន ប្រចាំនៅតំបន់មជ្ឈិមបូព៌ា។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់ថា លោក Sergei Lavrov ដែលជារដ្ឋមន្ត្រីការបរទេសរបស់លោក Putin តាំងពីឆ្នាំ២០០៤ មក និងលោក Yuri Ushakov ទីប្រឹក្សាគោលនយោបាយការបរទេសរបស់វិមានក្រឹមឡាំង បាន និងកំពុងធ្វើដំណើរទៅកាន់ទីក្រុងរីយ៉ាដ តាមសំណើរបស់លោក Putin។

លោក Peskov បាននិយាយថា៖ «មន្ត្រីជាន់ខ្ពស់ទាំង ២ ត្រូវបានគេរំពឹងថា នឹងរៀបចំកិច្ចប្រជុំជាមួយសមភាគីអាមេរិករបស់ខ្លួន នៅថ្ងៃអង្គារ ដែលនឹងផ្តោតជាចម្បងលើការស្ដារឡើងវិញនូវភាពស្មុគស្មាញគ្រប់យ៉ាងនៃទំនាក់ទំនងរុស្ស៊ី-អាមេរិក។ វាក៏នឹងមានការផ្ដោតផងដែរ លើការរៀបចំកិច្ចចរចាដែលអាចកើតមាន ស្ដីពីដំណោះស្រាយអ៊ុយក្រែន និងការរៀបចំកិច្ចប្រជុំ រវាងប្រធានាធិបតីនៃប្រទេសទាំង២»៕