ប្រភពសន្តិសុខចំនួន ២របស់លីបង់ បានឲ្យដឹងថា ការវាយប្រហាររបស់អ៊ីស្រាអែលលើរថយន្តមួយគ្រឿងនៅទីក្រុងកំពង់ផែភាគខាងត្បូង Sidon នាថ្ងៃចន្ទនេះ បានសម្លាប់មេបញ្ជាការក្រុមហាម៉ាស់ម្នាក់ដែលរៀបផែនការវាយប្រហារភេរវកម្ម ។

មនុស្សម្នា បានចោមរោមមើលរថយន្តរងការខូចខាត បន្ទាប់ពីការវាយប្រហារនោះ ជាមួយនឹងកងទ័ពលីបង់ ហើយក្រុមឆ្លើយតបដំបូង បានសែងបុរសរងរបួសម្នាក់ ។

ទីភ្នាក់ងារព័ត៌មានរដ្ឋលីបង់ រាយការណ៍ថា ក្រុមជួយសង្រ្គោះបានទាញយកសាកសពមនុស្សម្នាក់ចេញពីរថយន្ត ប៉ុន្តែពួកគេពុំបានផ្តល់អត្តសញ្ញាណជនរងគ្រោះនោះទេ ។

ដោយឡែក កងកម្លាំងការពារអ៊ីស្រាអែល(IDF) និយាយថា ការវាយប្រហារដោយយានដ្រូនលើរថយន្តមួយគ្រឿង នៅព្រឹកថ្ងៃចន្ទនេះ បានសម្លាប់មេបញ្ជាការជាន់ខ្ពស់មួយរូបនៅក្នុងក្រុមភេរវកម្មហាម៉ាស់ ។

យោងតាមសេចក្តីរាយការណ៍ពីយោធាអ៊ីស្រាអែល និងទីភ្នាក់ងារសន្តិសុខ Shin Bet បានឲ្យដឹងថា គោលដៅនៃការវាយប្រហារនេះ គឺលោក Mohammed Shaheen ដែលជាប្រធានប្រតិបត្តិការរបស់ក្រុមហាម៉ាស់នៅក្នុងប្រទេសលីបង់ ។

IDF និយាយថា លោក Shaheen មានការជាប់ពាក់ព័ន្ធនឹងការរៀបផែនការវាយប្រហារភេរវកម្មចេញពីប្រទេសលីបង់ ប្រឆាំងនឹងជនស៊ីវិលអ៊ីស្រាអែល ដោយមានការផ្តល់មូលនិធិ និងការណែនាំពីអ៊ីរ៉ង់ ៕