រដ្ឋមន្រ្តីការបរទេសសហរដ្ឋអាមេរិកលោក Marco Rubio បានជួបជាមួយរដ្ឋមន្រ្តីការបរទេសអារ៉ាប៊ីសាអូឌីតព្រះអង្គម្ចាស់ Faisal bin Farhan នៅទីក្រុង Riyadh នាថ្ងៃចន្ទនេះ មុនកិច្ចប្រជុំជាមួយក្រុមមន្រ្តីរុស្ស៊ី ដើម្បីបញ្ចប់សង្រ្គាមអ៊ុយក្រែន ។

រុស្ស៊ីនិយាយថា រដ្ឋមន្រ្តីការបរទេសរុស្ស៊ីលោក Sergei Lavrov នឹងមានជំនួបជាមួយក្រុមមន្រ្តីជាន់ខ្ពស់សហរដ្ឋអាមេរិក រួមទាំងរដ្ឋមន្រ្តីការបរទេសសហរដ្ឋអាមេរិកលោក Marco Rubio នៅថ្ងៃអង្គារ ដើម្បីផ្តោតសំខាន់លើការបញ្ចប់សង្រ្គាមអ៊ុយក្រែន ហើយនិងស្តាឡើងវិញនូវទំនាក់ទំនងដ៏ស្មុគស្មាញរវាងរុស្ស៊ី និងសហរដ្ឋអាមេរិក ។

លោក Rubio បានធ្វើដំណើរទៅដល់ទីក្រុង Riyadh តាមដំណើរគ្រោងទុកលើកមុន ហើយទីប្រឹក្សាសន្តិសុខជាតិសហរដ្ឋអាមេរិកលោក Mike Waltz និងប្រេសិតពិសេសប្រចាំតំបន់មជ្ឈិមបូព៌ាលោក Steve Witkoff ដែលនឹងធ្វើដំណើរមកដល់តាមក្រោយនោះ នឹងចូលរួមជាមួយរូបលោកនៅក្នុងកិច្ចប្រជុំជាមួយក្រុមមន្រ្តីរុស្ស៊ី ។

កិច្ចប្រជុំនេះដែរ ស្ថិតក្នុងចំណោមកិច្ចប្រជុំទល់មុខគ្នាកម្រិតខ្ពស់លើកដំបូងក្នុងរយៈពេលជាច្រើនឆ្នាំកន្លងមកនេះ រវាងក្រុមមន្រ្តីរុស្ស៊ី និងក្រុមមន្រ្តីសហរដ្ឋអាមេរិក ហើយនេះមានន័យបន្ទាប់មកនឹងមានជំនួបរវាងប្រធានាធិបតីសហរដ្ឋអាមេរិក និងប្រធានាធិបតីរុស្ស៊ី ៕