ទីភ្នាក់ងារសារព័ត៌មានរដ្ឋ WAM បានរាយការណ៍ថា ប្រធានាធិបតី លោក Volodymyr Zelenskiy បាននិយាយថា លោកបានពិភាក្សា អំពីការយកមកវិញនូវជនជាតិអ៊ុយក្រែនដែលត្រូវបានចាប់បង្ខាំងទុក ជាមួយប្រធានាធិបតីអារ៉ាប់រួម គឺព្រះអង្គ Sheikh Mohammed bin Zayed Al Nahyan ក្នុងកិច្ចប្រជុំនៅទីក្រុងឌូបៃ នាថ្ងៃចន្ទ (ទី១៧ ខែកុម្ភៈ)។

គួរបញ្ជាក់ថា ប្រទេសអេមីរ៉ាតអារ៉ាប់រួម (អារ៉ាប់រួម) បានដើរតួនាទីយ៉ាងសំខាន់ ក្នុងការត្រួតពិនិត្យនូវការវិលត្រលប់របស់ជនជាតិអ៊ុយក្រែនដែលត្រូវបាននិរទេសទៅរុស្ស៊ី ក្នុងអំឡុងសង្គ្រាមជិត ៣ឆ្នាំ ដែលភាគច្រើនជាកុមារ។

លោក Zelenskiy បាននិយាយមុននេះថា អាទិភាពចម្បង សម្រាប់ដំណើរទស្សនកិច្ចរបស់លោក គឺដើម្បីធានាបានថា «ប្រជាជនរបស់យើងកាន់តែច្រើន អាចត្រលប់ទៅប្រទេសកំណើតវិញ ដោយរួចផុតពីការចាប់បង្ខាំងទុក»។

ក្នុងជំនួបនោះ ព្រះអង្គម្ចាស់ Sheikh Mohammed បានបញ្ជាក់ជាថ្មីនូវការប្តេជ្ញារបស់អារ៉ាប់រួម ក្នុងការគាំទ្រដល់ដំណោះស្រាយដោយសន្តិវិធី ចំពោះជម្លោះអ៊ុយក្រែន និងគំនិតផ្តួចផ្តើម ដើម្បីបន្ធូរបន្ថយផលប៉ះពាល់មនុស្សធម៌របស់ខ្លួន៕