អង្គការសហប្រជាជាតិ (UN) នៅថ្ងៃចន្ទ (ទី១៧ ខែកុម្ភៈ) នេះ បានប្រាប់ឲ្យដឹងថា ខ្លួនកំពុងស្វែងរកទឹកប្រាក់ ៦ពាន់លានដុល្លារ សម្រាប់ប្រទេសស៊ូដង់ នៅឆ្នាំនេះ ពីម្ចាស់ជំនួយអន្តរជាតិនានា ដើម្បីយកទៅជួយសម្រាលទុក្ខវេទនា ជាអ្វីដែលខ្លួនហៅថា ជាវិបត្តិមួយ ក្នុងចំណោមវិបត្តិដ៏អាក្រក់បំផុត ក្នុងសម័យកាលនេះ ដែលកំណត់លក្ខណៈដោយការផ្លាស់ទីលំនៅក្នុងចំនួនដ៏ច្រើន និងគ្រោះទុរ្ភិក្សដែលកំពុងកើនឡើង។

ការអំពាវនាវរបស់ UN បង្ហាញពីការកើនឡើងនូវកម្រិតជាង ៤០ភាគរយ លើសពីឆ្នាំមុន សម្រាប់ប្រទេសស៊ូដង់ ក្នុងពេលដែលថវិកាជំនួយ នៅជុំវិញពិភពលោក កំពុងជួបបញ្ហា ដោយមួយផ្នែកបណ្ដាលមកពីការផ្អាកការផ្តល់មូលនិធិប្រកាសដោយប្រធានាធិបតីអាមេរិក លោក Donald Trump កាលពីខែមុន ដែលបានប៉ះពាល់ដល់កម្មវិធីសង្គ្រោះអាយុជីវិត នៅទូទាំងពិភពលោក។

ប៉ុន្តែ UN និយាយថា មូលនិធិនេះ គឺចាំបាច់ ដ្បិតសា្ថនភាពវិវត្តកាន់តែអាក្រក់ទៅៗ ដោយសារឥទ្ធិពលនៃសង្រ្គាមរយៈពេល ២២ខែ រវាងកងទ័ពស៊ូដង់ និងកងកម្លាំងគាំទ្ររហ័សប៉ារ៉ាយោធា (RSF) ដែលបាននាំឲ្យមានការផ្លាស់ទីលំនៅក្នុងកម្រិត ១ភាគ៥នៃចំនួនប្រជាជនរបស់ប្រទេសរួចហើយ និងបានបង្កឲ្យមានភាពអត់ឃ្លានធ្ងន់ធ្ងរឡើងៗ ក្នុងចំណោមប្រជាជនប្រហែលពាក់កណ្តាល។

អ្នកសម្របសម្រួលជំនួយសង្គ្រោះបន្ទាន់របស់ UN លោក Tom Fletcher បាននិយាយថា៖ «ប្រទេសស៊ូដង់ គឺជាគ្រាអាសន្នផ្នែកមនុស្សធម៌ ក្នុងទំហំដ៏គួរឲ្យភ្ញាក់ផ្អើល។ គ្រោះទុរ្ភិក្សកំពុងគ្របដណ្ដប់លើប្រទេសនេះហើយ។ ការរីករាលដាលនៃអំពើហង្សាផ្លូវភេទ កើតមានយ៉ាងឆាប់រហ័ស។ កុមារត្រូវបានសម្លាប់ និងរងរបួស។ ទុក្ខវេទនានេះ គឺគួរភ័យរន្ធត់ខ្លាំងណាស់»៕