​បាល់ទាត់៖ ​ក្រុម​សាមូរ៉ៃ​ជប៉ុន​បាន​បោះ​ជំ​ហ៊ាន​ឡើង​មក​ដល់​លេខ ២ ក្នុង​ពូ​ល B ហើយ​ក្រោយ​យក​ឈ្នះ​នៅ​ទឹកដី​អូ​ម៉​ង់ ១-០ និង​ស្រប​ពេល​ដែល​អូស្ត្រាលី​បាន​ត្រឹម​ស្មើគ្នា​ជាមួយ​ចិន​។ ​​ជប៉ុន​ដែល​ចាប់ផ្តើម​ ៣ប្រកួត​ដំបូង​ចាញ់ ២ប្រកួត​នោះ​បាន​យកឈ្នះ ៣ប្រកួត​ចុងក្រោយ​បូក​រួម​ទាំង​ជ័យជំនះយប់មិញ ១-០ ដែល​សំរេច​គ្រាប់​បាល់​ជ័យជំនះ​ដោយ​កីឡាករ​របស់​ក្លិប​​ប៊ែ​ល​ហ្ស៊ិ​ក Genk, Junya Ito នៅ​នាទី​ទី៨១​។

​​ជ័យជំនះ​នេះ​ធ្វើ​ឱ្យ​ជប៉ុន​ឡើង​មក​លេខ ២ ក្នុង​ពូ​ល B នេះ​មាន ១២ពិន្ទុ​ទំលាក់​អូស្ត្រាលី​ទៅ​លេខ ៣ វិញ​។ ​​អូស្ត្រាលី​យប់មិញ​មិន​អាច​រក្សា​បី​ពិន្ទុ​របស់​ខ្លួន​បាន​ឡើយ​ បើ​ទោះ​ជា​នាំមុខ​មុន​នៅ​នាទី​ទី​៣៨ ដោយ Mitchell Thomas Duke តែ​គ្រាប់​បី​ពិន្ទុ​នេះ​ក៏ត្រូវ​លប់ចោល​វិញ​ដោយ​ខ្សែប្រយុទ្ធ Espanyol, Wu Lei នៅ​នាទី​ទី៧១​។ ​​១ពិន្ទុ​នេះ​ធ្វើឱ្យ​អូស្ត្រាលី​ធ្លាក់​មក​លេខ ៣ វិញ​មាន ១១ពិន្ទុ​ខណៈ​ចិន​ឈរ​លេខ ៥ មាន ៥ពិន្ទុ​។

​​ចំណែកឯ​មួយ​ប្រកួត​ទៀត​វៀតណាម​នៅតែ​មិនអាច​រក​ពិន្ទុ​បាន​នៅឡើយ ក្រោយ​ចាញ់​ក្រុម​ភ្ញៀវ​អារ៉ាប៊ីសាអ៊ូឌីត ១-០ នៅ​កីឡដ្ឋាន My Dinh ទីក្រុង​ហាណូយ​។ ​​គ្រាប់​ជ័យជំនះ​របស់​អារ៉ាប៊ីសាអ៊ូឌីត​សំរេចបាន​នៅ​នាទី​ទី៣១ ដោយ​ខ្សែប្រយុទ្ធ Al-Hilal, Saleh Al-Sheri​។ ​​ជ័យ​ជំនះ​នេះ​ធ្វើឱ្យ​អារ៉ាប៊ីសាអ៊ូឌីត​បន្ត​នាំមុខគេ​ក្នុង​ពូ​ល B នេះ​ដដែល​មាន ១៦ពិន្ទុ​ក្រោយ​លេង ៦ ប្រកួត​ឈ្នះ ៥ ស្មើ ១៕

​អត្ថបទ​៖​នាង សុភា​វុ​ធ