អ៊ីរ៉ង់បាននិយាយកាលពីថ្ងៃចន្ទ (១៧ កុម្ភៈ) ថា ការគំរាមកំហែងរបស់សហរដ្ឋអាមេរិក និងអ៊ីស្រាអែល ប្រឆាំងនឹងទីក្រុងតេអេរ៉ង់ គឺជាការបំពានច្បាប់អន្តរជាតិយ៉ាងធ្ងន់ធ្ងរ ហើយបានចំអកថា ពួកគេមិនអាច "ធ្វើរឿងអាក្រក់អ្វីបានឡើយ" ដើម្បីបង្កផលប៉ះពាល់ដល់ទីក្រុងតេអេរ៉ង់។

ការអត្ថាធិប្បាយនេះបានធ្វើឡើងបន្ទាប់ពីនាយករដ្ឋមន្ត្រីអ៊ីស្រាអែល លោក Benjamin Netanyahu បានជួបជាមួយរដ្ឋមន្ត្រីការបរទេសអាមេរិក លោក Marco Rubio នៅទីក្រុងហ្សេរុយសាឡិម កាលពីថ្ងៃអាទិត្យ ហើយសម្ព័ន្ធមិត្តទាំងពីរបានប្តេជ្ញាចិត្តរារាំងមហិច្ឆតានុយក្លេអ៊ែររបស់អ៊ីរ៉ង់ និងឥទ្ធិពលរបស់ខ្លួននៅមជ្ឈិមបូព៌ា។

ថ្លែងនៅក្នុងសន្និសីទសារព័ត៌មានប្រចាំសប្តាហ៍កាលពីថ្ងៃចន្ទ អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បានឆ្លើយតបថា "ពួកគេមិនអាចធ្វើរឿងអាក្រក់ចំពោះអ៊ីរ៉ង់បានឡើយ ហើយក៏មិនអាចគំរាមអ៊ីរ៉ង់ ស្របពេលដែលអះអាងគាំទ្រកិច្ចសន្ទនាបាននោះដែរ"។

គួរបញ្ជាក់ថា លោកប្រធានាធិបតីអាមេរិក Donald Trump បានសម្តែងការបើកចំហចំពោះកិច្ចព្រមព្រៀងជាមួយទីក្រុងតេអេរ៉ង់ ប៉ុន្តែក៏បញ្ជាក់ពីការស្តារឡើងវិញនូវយុទ្ធនាការ "សម្ពាធអតិបរមា" លើអ៊ីរ៉ង់ ដែលត្រូវបានអនុវត្តក្នុងអំឡុងពេលអាណត្តិដំបូងរបស់ខ្លួន ដើម្បីបញ្ឈប់ទីក្រុងតេអេរ៉ង់ ពីការទទួលបានអាវុធនុយក្លេអ៊ែរ៕