ទីក្រុង រីអូ ដេ ហាណៃរ៉ូ (Rio de Janeiro) របស់ប្រេស៊ីល បានកត់ត្រាថ្ងៃក្តៅបំផុតរបស់ខ្លួនក្នុងពេលយ៉ាងហោចណាស់មួយទសវត្សរ៍ នៅពេលសីតុណ្ហភាពឡើងដល់ ៤៤អង្សាសេ កាលពីថ្ងៃចន្ទ (១៧ កុម្ភៈ) ខណៈអ្នកស្រុកនាំគ្នាសម្រុកទៅលេងសមុទ្រដើម្បីស្វែងរកភាពត្រជាក់ដល់រាងកាយ។

នេះជាសីតុណ្ហភាពខ្ពស់បំផុតចាប់តាំងពីទីក្រុងភាគអាគ្នេយ៍របស់ប្រេស៊ីលមួយនេះ បានចាប់ផ្តើមប្រព័ន្ធប្រកាសអាសន្នអាកាសធាតុកាលពីជាង ១០ឆ្នាំមុន។ សីតុណ្ហភាពខ្ពស់បំផុតទីពីរគឺ ៤៣,៨អង្សាសេ ក្នុងខែវិច្ឆិកា ឆ្នាំ២០២៣។

មន្ត្រីក្រុងបានចេញសេចក្តីជូនដំណឹងអំពីកម្ដៅយ៉ាងក្ដៅគគុកសម្រាប់ប៉ុន្មានថ្ងៃខាងមុខនេះ ដោយរៀបចំស្ថានីយ៍ផ្តល់ទឹក និងរៀបចំប្រព័ន្ធសុខាភិបាលសាធារណៈ ដើម្បីដោះស្រាយការកើនឡើងនៃករណីសុខភាពទាក់ទងនឹងកម្ដៅ។

អភិបាលក្រុង Rio លោក អេដ័រដូ ប៉ែស (Eduardo Paes) កាលពីថ្ងៃអាទិត្យ បានបដិសេធមិនលុបចោលពិធីបុណ្យ ខានីវ៉ល (Carnival) ដែលជិតមកដល់ក្នុងប៉ុន្មានសប្តាហ៍ខាងមុខ ប៉ុន្តែលោកបានផ្តល់អនុសាសន៍ឱ្យអ្នកចូលរួមប្រុងប្រយ័ត្ន។ មានក្ដីបារម្ភកាន់តែខ្លាំងឡើងពីបញ្ហាកម្ដៅនៅក្នុងព្រឹត្តិការណ៍សាធារណៈរបស់ប្រេស៊ីល ចាប់តាំងពីអ្នកគាំទ្ររបស់តារាចម្រៀង Taylor Swift បានស្លាប់ក្នុងអំឡុងពេលការប្រគុំតន្ត្រី Eras Tour របស់តារារូបនេះ នៅទីក្រុង Rio កាលពីខែវិច្ឆិកា ឆ្នាំ២០២៣៕