ក្រុមមន្ត្រីបាននិយាយនៅថ្ងៃចន្ទ (១៧ កុម្ភៈ) នេះថា ចំនួនអ្នកស្លាប់ដោយសារព្យុះរដូវរងាដ៏មានឥទ្ធិពលនៅភាគកណ្តាល និងភាគខាងកើតសហរដ្ឋអាមេរិក បានកើនឡើងដល់យ៉ាងហោចណាស់ ១៤នាក់ បន្ទាប់ពីទឹកជំនន់យ៉ាងគំហុក ខ្យល់បក់បោកខ្លាំង និងសីតុណ្ហភាពត្រជាក់ បានវាយប្រហារតំបន់នេះ។

សេវាអាកាសធាតុជាតិ (NWS) បានព្រមាននៅថ្ងៃចន្ទពីប្រព័ន្ធខ្យល់ព្យុះរដូវរងា ដែលនាំយកខ្យល់អាកទិកដ៏ "ត្រជាក់ខ្លាំង" ដោយអាកាសធាតុត្រូវបានគេរំពឹងថានឹងធ្លាក់ចុះដល់កម្រិត -៥១អង្សារសេនៅរដ្ឋម៉ុងតាណា (Montana) និងរដ្ឋ ណស ដេកូតា (North Dakota)។

លោក Andy Beshear អភិបាលរដ្ឋ Kentucky ជាទីដែលមានមនុស្សស្លាប់ច្រើនជាងគេក្នុងចំណោមតួលេខនោះ បានជំរុញឱ្យប្រជាជនចៀសវាងធ្វើដំណើរតាមផ្លូវនានាទូទាំងរដ្ឋ ខណៈអាជ្ញាធរក្នុងតំបន់ និងសហព័ន្ធបានប្រកាសដាក់តំបន់ប៉ះពាល់ក្នុងភាពអាសន្ន។

នៅក្នុងសេចក្ដីណែនាំកាលពីថ្ងៃចន្ទ សេវាអាកាសធាតុជាតិបានព្រមានថា ប្រព័ន្ធអាកាសធាតុត្រជាក់នឹងប៉ះពាល់ដល់តំបន់ដ៏ធំល្វឹងល្វើយ ដោយធ្វើឱ្យសីតុណ្ហភាពធ្លាក់ចុះខ្លាំងនៅតំបន់ទំនាបកណ្តាល ឆ្នេរសមុទ្រភាគខាងកើត និងរហូតដល់ចុងភាគខាងត្បូងនៃតំបន់ឈូងសមុទ្រ៕