ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី (Volodymyr Zelensky) បាននិយាយក្នុងបទសម្ភាសន៍មួយ ដែលបានចេញផ្សាយកាលពីថ្ងៃចន្ទថា សហរដ្ឋអាមេរិក កំពុងព្យាយាម «បំពេញបំណង»ទីក្រុង   មូស្គូ ក្នុងការចរចាស្តីពីអ៊ុយក្រែន និងបានព្រមានពីភាពទន់ខ្សោយខាងយោធារបស់អឺរ៉ុប។

ដោយប្រតិកម្មទៅនឹងការអត្ថាធិប្បាយផ្សះផ្សាចំពោះរុស្ស៊ីរបស់មន្ត្រីអាមេរិក លោក ហ្សេឡិនស្គី បាននិយាយថា៖«ឥឡូវនេះ សហរដ្ឋអាមេរិកកំពុងនិយាយអ្វីដែលអំណោយផលដល់លោក ពូទីន... ពីព្រោះពួកគេ ចង់ផ្គាប់ចិត្តលោក»។

លោក ហ្សេឡិនស្គី បានថ្លែងថា៖«ពួកគេចង់ជួបគ្នាឆាប់រហ័ស និងទទួលបានជ័យជម្នះរហ័ស។ ប៉ុន្តែអ្វីដែលពួកគេចង់បាន «គឺគ្រាន់តែជាបទឈប់បាញ់» មិនមែនជាការឈ្នះនោះទេ។ នេះបើយោងតាមការបកប្រែដែលផ្តល់ដោយប្រព័ន្ធផ្សព្វផ្សាយ ARD អំពីបទសម្ភាសន៍ដែលបានកត់ត្រាកាលពីថ្ងៃសៅរ៍ នៅទីក្រុង Munich នៃប្រទេសអាល្លឺម៉ង់។

ប្រធានាធិបតីអាមេរិកលោក ដូណាល់ ត្រាំ ( Donald Trump) បានធ្វើឲ្យសម្ព័ន្ធមិត្តភ្ញាក់ផ្អើល កាលពី   សប្តាហ៍មុន ដោយបានប្រកាសថា លោកបានសន្ទនាដោយផ្ទាល់ជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន ( Vladimir Putin) លើដំណើរការមួយ ដើម្បីបញ្ចប់សង្រ្គាមយ៉ាងឆាប់រហ័ស នៅអ៊ុយក្រែន។

ប្រមុខការពារជាតិអាមេរិក លោក Pete Hegseth ក៏បានចេញមុខបដិសេធថា អ៊ុយក្រែនមិនចូលរួមជាមួយអង្គការណាតូ ឬដណ្តើមយកទឹកដី ដែលបានបាត់បង់ តាំងពីឆ្នាំ ២០១៤ មកវិញទេ។