ប្រទេសអេហ្ស៊ីបកំពុងរៀបចំផែនការកសាងតំបន់ហ្កាហ្សាឡើងវិញ ដោយមិនបង្ខំប្រជាជនប៉ាឡេស្ទីនចេញពីតំបន់នេះ ដែលជាការប្រឆាំងនឹងសំណើរបស់លោកប្រធានាធិបតី ដូណាល់ ត្រាំ (Donald Trump) ក្នុងការផ្លាស់ប្តូរទីលំនៅប្រជាជនចេញពីទឹកដីនេះ ដូច្នេះសហរដ្ឋអាមេរិក អាចកាន់កាប់វាបាន។

សារព័ត៌មានរដ្ឋរបស់អេហ្ស៊ីប Al-Ahram បានលើកឡើងថា សំណើនេះ ទាមទារឲ្យមានការបង្កើត «តំបន់សុវត្ថិភាព» នៅក្នុងតំបន់ហ្កាហ្សា ដែលប្រជាជនប៉ាឡេស្ទីនអាចរស់ជាដំបូង ខណៈដែលក្រុមហ៊ុនសំណង់អេហ្ស៊ីប និងអន្តរជាតិ ឈូសឆាយ និងស្តារហេដ្ឋារចនាសម្ព័ន្ធរបស់ទឹកដីនេះ ឡើងវិញ។

យោងតាមមន្ត្រីអេហ្ស៊ីបពីរនាក់ និងអ្នកការទូតអារ៉ាប់ និងលោកខាងលិច បានឲ្យដឹងថា មន្ត្រីអេហ្ស៊ីបបាននិងកំពុងពិភាក្សាអំពីផែនការនេះ ជាមួយក្រុមអ្នកការទូតអឺរ៉ុប ក៏ដូចជាជាមួយអារ៉ាប៊ីសាអ៊ូឌីត កាតា និងអារ៉ាប់រួម។ មន្ត្រីអេហ្ស៊ីបម្នាក់ និងអ្នកការទូតអារ៉ាប់ម្នាក់ បាននិយាយថា ពួកគេក៏កំពុងពិភាក្សាអំពីមធ្យោបាយផ្តល់មូលនិធិដល់ការកសាងឡើងវិញ រួមទាំងសន្និសីទអន្តរជាតិស្តីពីការកសាងឡើងវិញ នៅតំបន់ហ្កាហ្សាផងដែរ។

ទាំងមន្ត្រីនិងអ្នកការទូត បាននិយាយក្នុងលក្ខខណ្ឌមិនបញ្ចេញឈ្មោះ ពីព្រោះសំណើនេះ កំពុងត្រូវបានពិភាក្សា។

សំណើនេះ បានកើតឡើង បន្ទាប់ពីមានភាពចលាចលជាអន្តរជាតិ ជុំវិញការអំពាវនាវរបស់លោក ត្រាំ ឲ្យផ្លាស់ប្តូរទីលំនៅប្រជាជនប៉ាឡេស្ទីនប្រមាណ ២លាននាក់ នៅតំបន់ហ្កាហ្សា។ លោក ត្រាំ បាននិយាយថា សហរដ្ឋអាមេរិក នឹងគ្រប់គ្រងតំបន់ហ្កាហ្សាស្ទ្រីប និងកសាងវាឡើងវិញឲ្យក្លាយទៅជា «តំបន់ទេសចរណ៍ឆ្នេរសមុទ្រនៃមជ្ឈិមបូព៌ា» ទោះបីជាប្រជាជនប៉ាឡេស្ទីន នឹងមិនអនុញ្ញាតឲ្យត្រឡប់មកវិញក៏ដោយ។