អ្នកនាំពាក្យក្រសួងការបរទេសចិន កាលពីថ្ងៃចន្ទ (ទី១៧ ខែកុម្ភៈ) បានប្រាប់ថា ប្រទេសចិនជំរុញឲ្យជប៉ុនគោរពតាមគោលការណ៍ចិនតែមួយ និងស្មារតីនៃឯកសារនយោបាយទាំង៤ រវាងចិន និងជប៉ុន ហើយឈប់មានកិច្ចកល ជុំវិញបញ្ហាកោះតៃវ៉ាន់។

អ្នកនាំពាក្យ លោក Guo Jiakun បានធ្វើការកត់សម្គាល់បែបនេះ នៅក្នុងសន្និសីទសារព័ត៌មានប្រចាំថ្ងៃ នៅពេលដែលត្រូវបានសួរឲ្យធ្វើអត្ថាធិប្បាយ ពាក់ព័ន្ធនឹងចំណាត់ការរបស់ក្រសួងយុត្តិធម៌ជប៉ុន ក្នុងការកែសម្រួលបទប្បញ្ញត្តិច្បាប់គ្រួសាររបស់ខ្លួន។ ការកែប្រែនោះ នឹងអនុញ្ញាតឲ្យអ្នកស្រុកកោះតៃវ៉ាន់ ប៉ាឡេស្ទីន និងតំបន់ ឬដែនដីដែលមិនមែនរដ្ឋផ្សេងទៀត ត្រូវបានចុះបញ្ជីជាទីកន្លែងដើមកំណើត សម្រាប់មនុស្សមកពីកន្លែងទាំងនោះ ដែលមានន័យថា នរណាម្នាក់មកពីកោះតៃវ៉ាន់ អាចត្រូវបានចុះបញ្ជីថា មកពីកោះតៃវ៉ាន់ជំនួសឲ្យមកពីប្រទេសចិន នាពេលអនាគត។

អមដោយការកត់សម្គាល់ថា កោះតៃវ៉ាន់ គឺជាផ្នែកដែលមិនអាចកាត់ផ្តាច់បានពីដែនដីរបស់ចិន ហើយជនរួមជាតិមកពីសងខាងនៃច្រកសមុទ្រតៃវ៉ាន់ គឺនៅក្នុងប្រទេសចិនតែមួយនោះ លោក Guo បាននិយាយថា បញ្ហាកោះតៃវ៉ាន់ គឺជាកិច្ចការផ្ទៃក្នុងរបស់ចិនសុទ្ធសាធ ដែលមិនអនុញ្ញាតឲ្យមានការជ្រៀតជ្រែកពីបរទេសឡើយ។

ជាមួយគ្នានេះ លោក Guo ក៏បានចង្អុលបង្ហាញពីការទទួលខុសត្រូវជាប្រវត្តិសាស្ត្រដ៏ធ្ងន់ធ្ងររបស់ជប៉ុន ចំពោះប្រជាជនចិន ដោយកត់សម្គាល់ថា ជប៉ុនបានលុកលុយតៃវ៉ាន់ និងបានដាក់អាណានិគមលើកោះនេះ។ ហើយលោកបានជំរុញឲ្យប្រទេសជប៉ុនចាត់វិធានការទាំងអស់បន្ថែមទៀត ដោយប្រយ័ត្នប្រយែងលើបញ្ហាកោះតៃវ៉ាន់៕