ប្រមុខធនាគាសហព័ន្ធ ឬធនាគារកណ្ដាល Bundesbank គឺលោក Joachim Nagel បាននិយាយថា ប្រទេសអាល្លឺម៉ង់នឹងរងផលប៉ះពាល់ខ្លាំងជាពិសេស ដោយសារគោលការណ៍គាំពារនិយម និងការដំឡើងពន្ធពាណិជ្ជកម្មរបស់សហរដ្ឋអាមេរិក ដោយធ្វើឲ្យទស្សនវិស័យដែលមានភាពអាប់អួរួចហើយកាន់តែអាក្រក់ទៅៗ សម្រាប់ប្រទេសមានសេដ្ឋកិច្ចធំបំផុតជាងគេរបស់តំបន់អឺរ៉ុបនេះ។

កាលពីថ្ងៃចន្ទ (ទី១៧ ខែកុម្ភៈ) តាមរយៈសុន្ទរកថា នៅទីក្រុង Frankfurt លោក Nagel បានលើកឡើងថា៖ «ការពឹងផ្អែកខ្លាំងរបស់យើង លើការនាំចេញ ធ្វើឲ្យពួកយើងងាយរងគ្រោះជាពិសេស ចំពោះការធ្លាក់ចុះនូវតម្រូវការបរទេស។ ភាពមិនច្បាស់លាស់ដែលមានឡើងកាន់តែខ្លាំងឡើងៗ គឺជាឧបសគ្គបន្ថែម»។

លោក Nagel ដែលជាសមាជិកក្រុមប្រឹក្សាគ្រប់គ្រងការកំណត់អត្រាការប្រាក់របស់ធនាគារកណ្តាលអ៊ឺរ៉ុបផងដែរនោះ បានលើកឡើងពីការប៉ាន់ប្រមាណរបស់ធនាគារ Bundesbank ដែលបង្ហាញថា ទិន្នផលនៅអាល្លឺម៉ង់ ក្នុងឆ្នាំ២០២៧ អាចមានកម្រិតជិត ១,៥ភាគរយ ដែលស្ថិតនៅក្រោមសេណារីយ៉ូមូលដ្ឋាន ដោយសារតែការផ្លាស់ប្តូរគោលនយោបាយរបស់សហរដ្ឋអាមេរិកនេះ។

គួរបញ្ជាក់ថា សេដ្ឋកិច្ចអាល្លឺម៉ង់ ដែលកំពុងត្រូវរងផលប៉ះពាល់ ដោយសារវិស័យផលិតកម្មរបស់ខ្លួនដែលកំពុងជួបការលំបាកនោះ បានជួបប្រទះនឹងការធ្លាក់ចុះរយៈពេល ២ឆ្នាំជាប់ៗគ្នា ក្នុងឆ្នាំ២០២៤ ហើយអាចនឹងធ្លាក់ចុះម្តងទៀត នៅឆ្នាំ២០២៥ ដែលជាកម្រិតធ្លាក់ចុះបន្តបន្ទាប់មិនធ្លាប់មានពីមុនមក ក្នុងសតវត្សរ៍នេះ។

ធនាគារ Bundesbank ព្យាករកំណើនសេដ្ឋកិច្ចត្រឹមតែ ០,២ភាគរយ នៅឆ្នាំ២០២៥ ហើយបានព្រមានរួចហើយថា ការធ្លាក់ចុះនៃផលិតផលក្នុងស្រុកសរុប គឺអាចកើតមាន ប្រសិនបើប្រធានាធិបតីអាមេរិក លោក Donald Trump អនុវត្តទាំងស្រុងនូវការដំឡើងពន្ធលើពាណិជ្ជកម្មលើប្រទេសចិន និងប្រទេសផ្សេងៗទៀត៕