ទូរទស្សន៍រដ្ឋ KRT រាយការណ៍ថា ក្រសួងការបរទេសកូរ៉េខាងជើង និយាយនៅថ្ងៃអង្គារនេះថា ខ្លួននឹងបន្តពង្រឹងកម្លាំងនុយក្លេអ៊ែររបស់ខ្លួន ហើយសូមធ្វើការបរិហារចំពោះការសន្យារួមគ្នាកាលពីពេលថ្មីៗនេះដោយសហរដ្ឋអាមេរិក កូរ៉េខាងត្បូង និងជប៉ុន សម្រាប់ការរំសាយអាវុធនុយក្លេអ៊ែររបស់ទីក្រុងព្យុងយ៉ាង ។

រដ្ឋមន្រ្តីការបរទេសសហរដ្ឋអាមេរិកលោក Marco Rubio រដ្ឋមន្រ្តីការបរទេសកូរ៉េខាងត្បូងលោក Cho Tae-yul និងរដ្ឋមន្រ្តីការបរទេសជប៉ុនលោក Takeshi Iwaya មាននូវជំនួបមួយកាលពីថ្ងៃសៅរ៍ចុងសប្តាហ៍មុន នៅក្រៅសន្និសីទសន្តិសុខ ក្នុងទីក្រុង Munich ប្រទេសអាល្លឺម៉ង់ ហើយនិងបានចេញសេចក្តីថ្លែងការណ៍មួយ បញ្ជាក់ឡើងវិញពីការប្តេជ្ញាចិត្តរបស់ពួកគេចំពោះការរំសាយអាវុធនុយក្លេអ៊ែរទាំងស្រុងរបស់កូរ៉េខាងជើង ។

ក្រសួងការបរទេសទីក្រុងព្យុងយ៉ាង បានរិះគន់ប្រទេសទាំង ៣ សម្រាប់ការបន្តផែនការដ៏ចាស់គំរិលគ្មានហេតុផល ហើយពួកគេព្រមានប្រឆាំងការស្វែងរកអ្វីដែលពួកគេចាត់ទុកថាជាទង្វើដ៏ល្ងង់ខ្លៅ ញុះញង់អរិភាព និងជម្លោះសមូហភាព ។

អ្នកអានព័ត៌មានរបស់ KRT ដកស្រង់សេចក្តីថ្លែងការណ៍របស់អ្នកនាំពាក្យក្រសួងការបរទេសកូរ៉េខាងជើងថា ដរាបណាសហរដ្ឋអាមេរិក និងការគំរាមកំហែងកម្លាំងអរិភាពប្រទេសចំណុះរបស់ពួកគេនៅមាន អាវុធនុយក្លេអ៊ែររបស់ពួកយើង គឺជាមធ្យោបាយសម្រាប់ការពារសន្តិភាព និងអធិបតេយ្យភាព និងជាមធ្យោបាយសម្រាប់ស្វ័យការពារស្របច្បាប់ដែលប្រគល់ដោយរដ្ឋធម្មនុញ្ញរបស់រដ្ឋកូរ៉េខាងជើង ៕