នៅថ្ងៃអង្គារនេះ ពលរដ្ឋលីបង់ជម្លៀសខ្លួនមកពីទីក្រុង Kfar Kila បានជួបជុំគ្នានៅច្រកចូលទីក្រុងភាគខាងត្បូង Deir Mimas រង់ចាំកងទ័ពលីបង់អនុញ្ញាតឲ្យពួកគេវិលត្រឡប់ទៅកាន់ភូមិដ្ឋានរបស់ពួកគេវិញ ក្រោយកងកម្លាំងអ៊ីស្រាអែល ត្រូវបានគេរាយការណ៍ថា បានដកទ័ពចេញពីទីនោះវិញ ។

លោក Mohammed Halawiដែលបានជម្លៀសខ្លួនចេញពីទីក្រុង Kfar Kila និយាយថា នេះគឺជាទឹកដីរបស់ពួកយើង ហើយពួកយើងនឹងមិនបោះបង់វាចោលនោះទេ បើទោះបីជាពួកយើងត្រូវប្រយុទ្ធគ្នា ១០០លើកក៏ដោយ ពួកយើងនឹងធ្វើសង្រ្គាមរហូតដល់ពួកយើងទទួលបានទឹកដីរបស់ពួកយើងវិលត្រឡប់មកវិញ ។

គួរឲ្យដឹងថា ក្រោមកិច្ចព្រមព្រៀងបទឈប់បាញ់ដែលរៀបចំឡើងដោយទីក្រុងវ៉ាស៊ីនតោនកាលពីខែវិច្ឆិកា ឆ្នាំ ២០២៤ ទាហានអ៊ីស្រាអែលត្រូវបានគេផ្តល់រយៈពេល ៦០ថ្ងៃ ដើម្បីដកទ័ពចេញពីតំបន់ភាគខាងត្បូងលីបង់ ជាទីដែលពួកគេបានបើកការវាយប្រហារតាមជើងគោក ប្រឆាំងនឹងក្រុមសកម្មប្រយុទ្ធមកពីក្រុមហេសបូឡា ចាប់តាំងពីដើមខែតុលារហូតមក ។

ឱសានវាទនេះ ត្រូវបន្តត្រឹមថ្ងៃទី ១៨ ខែកុម្ភៈនេះ ប៉ុន្តែក្រុមមន្រ្តីអ៊ីស្រាអែល និងលីបង់ ក៏ដូចជាមន្រ្តីការទូតបរទេស បានរំពឹងទុកថា យោធានឹងទុកទាហានមួយចំនួននៅតំបន់ព្រំដែនលីបង់ ។

ខណៈពេលនោះដែរ បារាំងស្នើសុំឲ្យកងកម្លាំងអង្គការសហប្រជាជាតិ រួមទាំងទាហានបារាំងឈរជើងជំនួសទាហានអ៊ីស្រាអែលនៅតាមចំណុចព្រំដែនសំខាន់ៗ ។

ក្រុមហេសបូឡា និយាយកាលពីថ្ងៃអាទិត្យថា កងកម្លាំងអ៊ីស្រាអែលនៅឈរជើងក្នុងប្រទេសលីបង់ ហើយក្រោយពីថ្ងៃអង្គារនេះតទៅ ពួកគេនឹងត្រូវចាត់ទុកថាជាកងកម្លាំងកាន់កាប់ ៕