នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ (Benjamin Netanyahu) បានច្រានចោលលទ្ធភាពរបស់អាជ្ញាធរប៉ាឡេស្ទីន (PA) ក្នុងគ្រប់គ្រងតំបន់ហ្កាហ្សាក្រោយសង្គ្រាម។

ក្នុងការឆ្លើយតបទៅនឹងរបាយការណ៍ប្រព័ន្ធផ្សព្វផ្សាយដែលថា ក្រុមហាម៉ាស បានបង្ហាញពីឆន្ទៈក្នុងការបោះបង់ការគ្រប់គ្រងទឹកដីនេះ ទៅឲ្យអាជ្ញាធរប៉ាឡេស្ទីន ( PA) លោក ណេតាន់យ៉ាហ៊ូ បាននិយាយនៅក្នុងសេចក្តីថ្លែងការណ៍មួយថា៖«ដូចដែលខ្ញុំបានសន្យា ថ្ងៃបន្ទាប់ពីសង្គ្រាមនៅតំបន់ហ្កាហ្សា នឹងមិនមានក្រុមហាម៉ាស ហើយក៏គ្មានអាជ្ញាធរប៉ាឡេស្ទីនដែរ។

លោកបានរំលឹកឡើងវិញនូវការគាំទ្ររបស់លោក ចំពោះផែនការរបស់ប្រធានាធិបតីអាមេរិក លោក      ដូណាល់ ត្រាំ សម្រាប់តំបន់ហ្កាហ្សា ដែលរួមមានបញ្ជូនប្រជាជនប៉ាឡេស្ទីន ទៅកាន់ប្រទេសជិតខាង។ ក្រុមមេដឹកនាំអារ៉ាប់ បានច្រានចោលសំណើនេះ។

លោក ណេតាន់យ៉ាហ៊ូ បាននិយាយថា៖ «ខ្ញុំប្តេជ្ញាចំពោះផែនការរបស់លោកប្រធានាធិបតី ត្រាំ សម្រាប់ការបង្កើតតំបន់ហ្កាហ្សាមួយផ្សេងទៀត»។

អ៊ីស្រាអែលជំទាស់នឹងអធិបតេយ្យភាពប៉ាឡេស្ទីន នៅក្នុងតំបន់ហ្កាហ្សាស្ទ្រីប វេសបែង និងទីក្រុងហ្ស៊េរុយសាឡឹមខាងកើត ជាទឹកដីដែលខ្លួនបានដណ្តើមយកក្នុងសង្រ្គាមមជ្ឈិមបូព៌ាឆ្នាំ ១៩៦៧។