ឆ្មាំល្បាតឆ្នេរហ្វីលីពីន បានចោទប្រកាន់ការធ្វើសមយុទ្ធហោះហើរដ៏គ្រោះរបស់កងទ័ពជើងទឹកចិននៅថ្ងៃអង្គារនេះ ពេលដែលពួកគេបានហោះហើរមកជិតយន្តហោះរដ្ឋាភិបាលមួយគ្រឿង ដែលហោះល្បាតតំបន់ថ្មប៉ប្រះទឹកនៅសមុទ្រចិនខាងត្បូង ។

ឆ្មាំល្បាតឆ្នេរហ្វីលីពីន និយាយថា យន្តហោះចុះលើទឹករដ្ឋាភិបាលមួយគ្រឿងនៅថ្ងៃអង្គារនេះ បានហោះល្បាតលើតំបន់ថ្មប៉ប្រះទឹក Scarborough ស្ថិតក្នុងតំបន់សេដ្ឋកិច្ចដាច់មុខរបស់ហ្វីលីពីន ។

យោងតាមការអះអាងរបស់ឆ្មាំល្បាតឆ្នេរហ្វីលីពីន បានឲ្យដឹងថា ឧទ្ធម្ភាគចក្រកងទ័ពជើងទឹកកងទ័ពរំដោះប្រជាមានិតចិន បានហោះមកក្បែរនៅចម្ងាយតែ ៣ម៉ែត្រប៉ុណ្ណោះពីយន្តហោះចុះលើទឹក ដែលពួកគេនិយាយថា វាគឺជាការបំពានយ៉ាងច្បាស់ក្រឡែត និងជាការពុំគោរពទាល់តែសោះចំពោះបទប្បញ្ញត្តិអាកាសចរណ៍ ។

ទោះបីជាយ៉ាងណាក៏ដោយ កងបញ្ជាការភូមិភាគត្បូងរបស់ចិន បាននិយាយនៅថ្ងៃអង្គារនេះថា យន្តហោះហ្វីលីពីន បានឈ្លានពានចូលដែនអាកាសរបស់ចិន លើតំបន់ថ្មប៉ប្រះទឹក Scarborough និងបានបំពានអធិបតេយ្យភាពរបស់ចិន ។

សូមបញ្ជាក់ថា ចិនបានប្រកាសអធិបតេយ្យភាពស្ទើតែទាំងអស់នៅសមុទ្រចិនខាងត្បូង ដែលជាផ្លូវទឹកដ៏សំខាន់មួយសម្រាប់ពាណិជ្ជកម្មតាមនាវាប្រចាំឆ្នាំតម្លៃជាង ៣សែនកោដិដុល្លារ ធ្វើឲ្យពួកគេមានការខ្វែងគំនិតគ្នាជាមួយប៊្រុយណេ ឥណ្ឌូនេស៊ី ម៉ាឡេស៊ី ហ្វីលីពីន និងវៀតណាម ៕