រដ្ឋមន្ត្រីការបរទេស លោក Gideon Saar នៅថ្ងៃអង្គារ (ទី១៨ ខែកុម្ភៈ) នេះ បាននិយាយថា អ៊ីស្រាអែលនឹងចាប់ផ្តើមកិច្ចពិភាក្សាដំណាក់កាលទី២ នៃកិច្ចព្រមព្រៀងបទឈប់បាញ់ នៅតំបន់ហ្កាហ្សា ក្នុងនោះរួមទាំងការដោះដូរចំណាប់ថ្នូរអ៊ីស្រាអែលដែលនៅសល់ ជាមួយអ្នកជាប់ឃុំឃាំងប៉ាឡេស្ទីន។

កិច្ចពិភាក្សា សម្រាប់ដំណាក់កាលទី២ នៃកិច្ចព្រមព្រៀងនេះ ត្រូវបានគេរំពឹងថា កំពុងដំណើរការ មុនពេលដំណាក់កាលទី១ ត្រូវបញ្ចប់នៅថ្ងៃទី២ ខែមីនា ប៉ុន្តែប្រទេសកាតាបានឲ្យដឹងថា កិច្ចពិភាក្សាមិនទាន់បានចាប់ផ្តើមជាផ្លូវការនៅឡើយទេ។

លោក Saar បាននិយាយនៅក្នុងសន្និសីទសារព័ត៌មានថា «គំរូជាមួយក្រុមហេបូឡា» នៅក្នុងតំបន់ហ្កាហ្សា នឹងមិនអាចទទួលយកបានឡើយ សម្រាប់អ៊ីស្រាអែល «ហើយដូច្នេះ យើងត្រូវការការគ្មានយោធាទាំងស្រុង នៅតំបន់ និងគ្មានវត្តមានរបស់អាជ្ញាធរប៉ាឡេស្ទីន»។

លោកបានបន្ថែមថា អ៊ីស្រាអែលបានដឹងអំពីផែនការជំនួសរបស់រដ្ឋអារ៉ាប់ សម្រាប់តំបន់ហ្កាហ្សា ដែលធ្វើឡើង ដើម្បីប្រឆាំងនឹងសំណើរបស់ប្រធានាធិបតីអាមេរិក លោក Donald Trump ក្នុងការអភិវឌ្ឍឡើងវិញនូវដែនដីនេះ ក្រោមការគ្រប់គ្រងរបស់សហរដ្ឋអាមេរិក ដែលនាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា ស័ក្តិសមទទួលយកបាន។

យ៉ាងណាក្ដី លោក Saar បានបន្ថែមថា អ៊ីស្រាអែលនឹងមិនគាំទ្រផែនការ ដែលនឹងឃើញមានការគ្រប់គ្រងរបស់ជនស៊ីវិល នៅតំបន់ហ្កាហ្សា ដែលត្រូវបានផ្ទេរពីក្រុមហាម៉ាសទៅឲ្យអាជ្ញាធរប៉ាឡេស្ទីននោះទេ៕