ចរាចរណ៍តាមទូក បានចាប់ផ្ដើមមានវិញហើយក្នុងបឹងដ៏ធំ Kivu នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ នាថ្ងៃអង្គារ (ទី១៨ ខែកម្ភៈ) នេះ ខណៈដែលកំពង់ផែបានបើកឡើងវិញ នៅក្នុងទីក្រុងចំនួន២ ដែលបានធ្លាក់ទៅក្រោមការគ្រប់គ្រងរបស់ក្រុមឧទ្ទាម M23 ជាការវិវត្តមួយដែលអង្គការសហប្រជាជាតិ (UN) បានលើកឡើងថា អាចជួយសម្រួលដល់ការផ្គត់ផ្គង់ជំនួយមនុស្សធម៌ បន្ទាប់ពីមានការប្រយុទ្ធគ្នា និងការលួចប្លន់ជាច្រើនសប្តាហ៍។

ក្រុមឧទ្ទាម M23 ដែលគាំទ្រដោយប្រទេសរ៉្វាន់ដា កំពុងព្យាយាមបង្ហាញថា ខ្លួនអាចគ្រប់គ្រងទីក្រុង Goma និង Bukavu ខណៈដែលមន្ត្រីរដ្ឋាភិបាល និង UN ព្រមានអំពីមហន្តរាយមនុស្សធម៌ ដែលកំពុងកើតមាន ក្នុងនោះរួមទាំងលទ្ធភាពនៃការផ្ទុះឡើងនូវជំងឺអាសន្នរោគ និងជំងឺផ្សេងៗទៀត។

កម្មវិធីស្បៀងអាហារពិភពលោក បានឲ្យដឹងថា ក្រុមចោរបានលួចការផ្គត់ផ្គង់ស្បៀងអាហារប្រមាណ ៧.០០០តោន ខណៈដែលយោធាកុងហ្គោ បានដកកងកម្លាំងចេញពីទីក្រុង Bukavu ហើយពួកឧទ្ទាមបានចូលទៅដល់ទីក្រុងនេះ កាលពីចុងសប្តាហ៍។

ប្រតិបត្តិករឈ្មោះ Lweni Ndale បាននិយាយថា ទូកដឹកអ្នកដំណើរពីទីក្រុង Bukavu ទៅទីក្រុង Goma បានចាកចេញ នៅព្រឹកថ្ងៃអង្គារនេះ ដោយបន្ថែមថា នេះគឺជាទូកដំបូង គិតចាប់តាំងពីចុងខែមករា ពោលគឺភ្លាមៗបន្ទាប់ពីទីក្រុង Goma បានធ្លាក់ទៅក្រោមការគ្រប់គ្រងរបស់ក្រុមឧទ្ទាម M23។

ការិយាល័យមនុស្សធម៌របស់ UN បានប្រាប់ថា ការចាប់ផ្ដើមឡើងវិញនូវចរាចរណ៍តាមទូកនេះ នឹងអនុញ្ញាតឲ្យក្រុមជំនួយផ្ដល់ការផ្គត់ផ្គង់ទៅកាន់កោះ Idjwi នៅបឹង Kivu ជាកន្លែងដែលមនុស្សជាង ១០០.០០០នាក់ បានស្វែងរកការជ្រកកោន ដើម្បីគេចចេញពីការប្រយុទ្ធគ្នា៕