អភិបាលក្រុង លោក Hennadiy Trukhanov បាននិយាយនៅព្រឹកថ្ងៃពុធ (១៩ កុម្ភៈ) នេះថា កងកម្លាំងរុស្ស៊ី បានវាយប្រហារដោយយានដ្រូនលើទីក្រុងកំពង់ផែសមុទ្រខ្មៅ Odesa របស់អ៊ុយក្រែន ដោយបានធ្វើឱ្យអ្នកស្រុកភាគច្រើនពុំមានថាមពលអគ្គិសនី ទឹក ឬកម្ដៅសម្រាប់ប្រើប្រាស់។

លោក Trukhanov បានសរសេរនៅលើកម្មវិធីផ្ញើសារតេលេក្រាមថា "មន្ទីរពេទ្យ គ្លីនិក និងកន្លែងហេដ្ឋារចនាសម្ព័ន្ធសង្គម ពុំមានកម្ដៅ និងថាមពលប្រើប្រាស់ទេ" ដោយពណ៌នាការវាយប្រហារលើក្រុង Odesa នេះថាជា "ទ្រង់ទ្រាយធំ"។

ទីក្រុង Odesa គឺជាគោលដៅជាញឹកញាប់នៃការវាយប្រហាររបស់រុស្ស៊ី នៅក្នុងសង្រ្គាមជិត ៣ឆ្នាំ ជាពិសេសមូលដ្ឋាននៅក្នុងកំពង់ផែចំនួន៣ ទាំងនៅក្នុង និងជុំវិញទីក្រុង។ លោក Trukhanov បានបង្ហោះរូបភាពដែលបង្ហាញពីអគាររងការខូចខាត ប៉ុន្តែមិនបានលើកឡើងពីអ្នកស្លាប់ និងរបួសទេ ហើយបាននិយាយថា អ្នកជំនាញកំពុងវាយតម្លៃការខូចខាត។

អ្នកសរសេរប្លុកក្នុងស្រុកម្នាក់និយាយថា យានដ្រូនជាច្រើនត្រូវបានពិនិត្យឃើញនៅទូទាំងភាគខាងត្បូងអ៊ុយក្រែន ជុំវិញពេលវេលានៃការវាយប្រហារលើក្រុង Odesa។ អ្នកផ្សេងទៀតនិយាយថា មន្ទីរពេទ្យក្នុងទីក្រុងមួយត្រូវបានវាយប្រហារ ហើយអ្នកស្រុកមួយចំនួននិយាយថា ពួកគេបានរកឃើញបំណែកនៃយានដ្រូនធ្លាក់នៅក្នុងទីធ្លាតំបន់នោះ៕