ប្រធានាធិបតីប្រទេសកូឡុំប៊ី លោក Gustavo Petro បាននិយាយកាលពីថ្ងៃអង្គារ ទី១៨ ខែកុម្ភៈ ថា ក្រុមអ្នកជួញដូរគ្រឿងញៀន មានមីស៊ីលចំនួនពីរគ្រាប់ ដែលពួកគេមានផែនការបាញ់ទៅលើយន្តហោះរបស់លោក ក្នុងការប៉ុនប៉ងធ្វើឃាតលោក។

លោក បានចាត់ទុកការគំរាមកំហែងនេះ ថាជាជោគជ័យនៃកិច្ចខិតខំប្រឹងប្រែងរបស់លោក ក្នុងការប្រយុទ្ធប្រឆាំងការជួញដូរគ្រឿងញៀន។ លោក Petro មិនបានបន្ថែមភ័ស្តុតាងណាមួយសម្រាប់ការអះអាងរបស់លោកទេ ហើយលោកក៏ពុំបានបញ្ចេញឈ្មោះជនសង្ស័យណាម្នាក់ដែរ។

យោងតាមក្រសួងការពារជាតិបានឱ្យដឹងថា កងកម្លាំងសន្តិសុខរបស់ប្រទេសកូឡុំប៊ី រឹបអូសបានកូកាអ៊ីនចំនួន ៨៨៣,៨ តោន ក្នុងឆ្នាំ ២០២៤ ដែលកើនឡើងពី ៧៤៦,៣ តោន ក្នុងឆ្នាំ ២០២៣។

ការផលិត និងការជួញដូរកូកាអ៊ីន រួមជាមួយនឹងការផលិតមាសខុសច្បាប់ ត្រូវបានចាត់ទុកថាជាកត្តាជំរុញដ៏សំខាន់នៃជម្លោះប្រដាប់អាវុធរយៈពេល៦ទសវត្សរ៍មកនេះ ដែលបានសម្លាប់មនុស្សជាង ៤៥០.០០០នាក់ នៅប្រទេសកូឡុំប៊ី។