ហ្វីលីពីន និងចិន បានអះអាងផ្ទុយគ្នាកាលពីថ្ងៃអង្គារសប្ដាហ៍នេះអំពីការពើបប្រទះកណ្តាលអាកាសជុំវិញដែនទឹកមានជម្លោះនៅក្នុងសមុទ្រចិនខាងត្បូង។

ឆ្មាំល្បាតឆ្នេររបស់ទីក្រុងម៉ានីល បានចោទប្រកាន់ទីក្រុងប៉េកាំងចំពោះ"សមយុទ្ធជើងហោះហើរដ៏គ្រោះថ្នាក់" បន្ទាប់ពីការហោះហើរបក្រកៀកគ្នារវាងឧទ្ធម្ភាគចក្រយោធាចិន និងយន្តហោះហ្វីលីពីន។

ឧបទ្ទវហេតុនេះបានកើតឡើងលើតំបន់កោះផ្កាថ្មប្រកួតប្រជែងដែលគេស្គាល់ថា តំបន់ថ្មប៉ប្រះទឹកScarborough Shoal ដែនទឹក Bajo de Masinloc ឬ កោះ Huangyan Dao ។

អ្នកនាំពាក្យឆ្មាំល្បាតឆ្នេរហ្វីលីពីន លោក Jay Tarriela បាននិយាយនៅលើបណ្ដាញសង្គម Xថា ការពើបប្រទះកណ្ដាលអាកាសនេះ បានកើតឡើងអំឡុងការហោះហើយត្រួតពិនិត្យដែនសមុទ្រ។

លោកបាននិយាយថា ឧទ្ធម្ភាគចក្រចិនអាចបង្កគ្រោះថ្នាក់ដល់សុវត្ថិភាពរបស់អ្នកបើកយន្តហោះ និងអ្នកដំណើរ។

ជាមួយគ្នានោះអ្នកនាំពាក្យយោធាចិន លោក វរសេនីយ៍ឯក Tian Junli បានច្រានចោលការអះអាងនេះ ដោយនិយាយថា យន្តហោះហ្វីលីពីន បានបំពានចូលដែនអាកាសចិនដោយខុសច្បាប់។

លោក Junli បាននិយាយថា សកម្មភាពរបស់ហ្វីលីពីនបានរំលោភយ៉ាងធ្ងន់ធ្ងរលើអធិបតេយ្យភាពរបស់ប្រទេសចិន និងបទប្បញ្ញត្តិពាក់ព័ន្ធនៃច្បាប់អន្តរជាតិ និងចិនដោយបន្ថែមថាកោះ Huangyan Dao គឺជាទឹកដីរបស់ប្រទេសចិន ។

លោកបានចោទប្រកាន់ទីក្រុងម៉ានីល ពីការប៉ុនប៉ងអះអាង “ការទាមទារអធិបតេយ្យភាពខុសច្បាប់តាមរយៈការបង្ករឿងដោយយោធា និងបំភាន់ការយល់ឃើញរបស់អន្តរជាតិ ដោយប្តេជ្ញាថា កងកម្លាំងចិននឹងការពារអធិបតេយ្យភាព និងសន្តិសុខជាតិ ព្រមទាំងសន្តិភាព និងស្ថិរភាពនៅសមុទ្រចិនខាងត្បូង៕