អ្នកនាំពាក្យរដ្ឋាភិបាលសហរដ្ឋអាមេរិកមួយរូប កាលពីថ្ងៃអង្គារ (១៨ កុម្ភៈ) បានបដិសេធមិនបញ្ជាក់ពីរបាយការណ៍របស់សារព័ត៌មានរ៉យទ័រ ដែលរាយការណ៍ថា កោះតៃវ៉ាន់ កំពុងរៀបចំផែនការទិញសព្វាវុធតម្លៃរាប់ពាន់លានដុល្លារពីសហរដ្ឋអាមេរិក ដើម្បីផ្គាប់ចិត្តរដ្ឋបាលលោក Donald Trump។

គួរបញ្ជាក់ថា ទីភ្នាក់ងារព័ត៌មានរ៉យទ័រ បានរាយការណ៍នៅព្រឹកថ្ងៃអង្គារ ដោយដកស្រង់ប្រភពអនាមិកចំនួនបីថា រដ្ឋាភិបាលក្រុងតៃប៉ិ កំពុងពិភាក្សាជាមួយទីក្រុងវ៉ាស៊ីនតោន ជុំវិញកិច្ចព្រមព្រៀងអាវុធដែលមានតម្លៃប្រមាណពី ៧ពាន់លានដុល្លារទៅ ១០ពាន់លានដុល្លារ។

នៅពេលត្រូវសាកសួរដើម្បីផ្តល់យោបល់ ក្រសួងការបរទេសសហរដ្ឋអាមេរិកបានប្រាប់សារព័ត៌មាន CNA ថា "ដូចដែលការអនុវត្តជាយូរមកហើយ ទីក្រុងវ៉ាស៊ីនតោនមិនធ្វើអត្ថាធិប្បាយណាមួយឡើយ រហូតទាល់តែកិច្ចព្រមព្រៀងមួយត្រូវបានសម្រេចជាផ្លូវការ"។

ប្រទេសចិន តែងរិះគន់ជំនួយយោធារបស់សហរដ្ឋអាមេរិក ដល់កោះតៃវ៉ាន់ ដោយនិយាយថា កញ្ចប់ជំនួយណាមួយ បានរំលោភបំពានយ៉ាងធ្ងន់ធ្ងរលើ "គោលការណ៍ចិនតែមួយ" និងបទប្បញ្ញត្តិនៃសេចក្តីថ្លែងការណ៍រួមរវាងចិន និងសហរដ្ឋអាមេរិក៕