ជាលើកដំបូងចាប់តាំងពីជំងឺរាតត្បាតជំងឺកូវីដ-១៩បានចាប់ផ្តើម ជំងឺគ្រុនផ្តាសាយធំ បានកើនលើសពីជំងឺកូវីដ-១៩ ជាជំងឺផ្លូវដង្ហើមធ្ងន់ធ្ងរបំផុតនៅរដ្ឋកាលីហ្វ័រនីញ៉ា ដែលជំរុញឱ្យមន្ទីរពេទ្យនានាទប់ទល់ទៅនឹងចំនួនអ្នកជំងឺច្រើនលើសលប់ ក្នុងពេលមានការកើនឡើងករណីជំងឺផ្តាសាយធំ។

យោងតាមមជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC)បានឲ្យដឹងថា ការកើនឡើងករណីជំងឺផ្តាសាយធំនេះ កើតឡើងក្នុងពេលដែលអត្រាចាក់វ៉ាក់សាំងទាបជាប្រវត្តិសាស្ត្រ ដោយមានតែ៤៤ភាគរយប៉ុណ្ណោះនៃមនុស្សពេញវ័យ និង៤៦ភាគរយនៃកុមារ ដែលបានទទួលវ៉ាក់សាំងបង្ការជំងឺគ្រុនផ្តាសាយធំនៅរដូវកាលនេះ។

លោក Peter Chin-Hong អ្នកជំនាញផ្នែកជំងឺឆ្លងនៅសាកលវិទ្យាល័យរដ្ឋកាលីហ្វ័រនីញ៉ា ទីក្រុងសាន់ហ្វ្រាន់ស៊ីស្កូ បាននិយាយថា «មន្ទីរពេទ្យរបស់យើង ពេញទៅដោយអ្នកជំងឺគ្រុនផ្តាសាយធំ» ។ លោកបាននិយាយបន្ថែមថា «ជំងឺគ្រុនផ្តាសាយធំ ហាក់ដូចជាមាននៅគ្រប់ទីកន្លែង»។

នៅគ្លីនិកក្នុងស្រុកនៅតំបន់ឈូងសមុទ្រ បានបង្ហាញថា ការធ្វើតេស្តជំងឺផ្លូវដង្ហើមមានច្រើនជាង៧០% បច្ចុប្បន្ននេះវិជ្ជមានជំងឺគ្រុនផ្តាសាយធំ លើសពីករណីជំងឺផ្លូវដង្ហើម(RSV) ជំងឺCOVID-19 និងជំងឺផ្តាសាយធម្មតា។ ចាប់តាំងពីថ្ងៃទី១ ខែកក្កដាមក រដ្ឋកាលីហ្វ័រនីញ៉ា បានរាយការណ៍ថាមានអ្នកស្លាប់ដោយសារជំងឺគ្រុនផ្តាសាយធំ យ៉ាងហោចណាស់៥៦១នាក់ ភាគច្រើនគឺក្នុងចំណោមអ្នកដែលមានអាយុលើសពី៦៥ ឆ្នាំ។ នៅទូទាំងប្រទេស មជ្ឈមណ្ឌលគ្រប់គ្រងនិងបង្ការជំងឺរបស់សហរដ្ឋអាមេរិក(CDC) បានប៉ាន់ប្រមាណថាមានករណីជំងឺផ្តាសាយធំយ៉ាងហោចណាស់២៩លានករណី ខណៈសម្រាកព្យាបាលនៅមន្ទីរពេទ្យមានចំនួន ៣៧០.០០០នាក់ និងមានអ្នកស្លាប់ចំនួន១៦.០០០នាក់ ក្នុងអំឡុងរដូវផ្តាសាយធំ ឆ្នាំ២០២៤-២០២៥ គិតត្រឹមថ្ងៃទី៨ ខែកុម្ភៈ។