អ្នកនយោបាយហ្វាំងឡង់និងស៊ុយអែតកាលពីថ្ងៃអង្គារ បានបញ្ជាក់ពីផលប្រយោជន៍របស់អឺរ៉ុប ក្នុងកិច្ចខិតខំប្រឹងប្រែងសន្តិភាព ដែលកំពុងបន្ត ខណៈដែលសហរដ្ឋអាមេរិក និងរុស្ស៊ី បានបើកកិច្ចចរចាបិទទ្វារស្តីពីការបញ្ចប់សង្រ្គាម នៅអ៊ុយក្រែន។

នាយករដ្ឋមន្ត្រីហ្វាំងឡង់ លោក Petteri Orpo បាននិយាយនៅក្នុងសន្និសីទសារព័ត៌មានថា ដំណោះស្រាយសន្តិភាពសម្រាប់អ៊ុយក្រែន មិនគួរមានការផ្លាស់ប្តូរចំពោះរចនាសម្ព័ន្ធសន្តិសុខរបស់អឺរ៉ុបទេ ហើយផលប្រយោជន៍របស់អឺរ៉ុប គួរតែជាផ្នែកសំខាន់មួយនៃកិច្ចខិតខំប្រឹងប្រែងនេះ។

លោកបានសង្កត់ធ្ងន់ថា លទ្ធផលនៃកិច្ចចរចាសន្តិភាព នឹងមិនត្រឹមតែប៉ះពាល់ដល់អឺរ៉ុបទាំងមូលប៉ុណ្ណោះទេ ប៉ុន្តែថែមទាំងប៉ះពាល់ដល់សន្តិសុខរបស់ហ្វាំងឡង់ផងដែរ។

លោក Orpo បានបញ្ជាក់ជាថ្មីនូវការគាំទ្រពេញទំហឹងរបស់ហ្វាំងឡង់ ចំពោះអធិបតេយ្យភាព និងបូរណភាពទឹកដីរបស់អ៊ុយក្រែន ហើយបានអំពាវនាវឲ្យមានការគាំទ្រដ៏ធំបំផុតសម្រាប់អ៊ុយក្រែន។

នៅទីក្រុង Stockholm រដ្ឋមន្ត្រីការបរទេសស៊ុយអែតលោកស្រី Maria Stenergard បានបង្ហា្ញពីការព្រួយបារម្ភស្រដៀងគ្នានេះ ដោយសង្កត់ធ្ងន់ថា គ្មានអ្វីអាចចរចាបាន ដោយគ្មានប្រទេសអ៊ុយក្រែនទេ ហើយវាចាំបាច់ណាស់ដែលផលប្រយោជន៍អឺរ៉ុប ត្រូវយកមកពិចារណា ក្នុងកិច្ចចរចាសន្តិភាពដែលកំពុងបន្តនេះ។

លោកស្រីបានបន្ថែមថា ជំនួបរវាងសហរដ្ឋអាមេរិកនិងរុស្ស៊ី មិនអាចចាត់ទុកថា ជាការចរចាបានទេ ព្រោះអ៊ុយក្រែន មិនជាប់ពាក់ព័ន្ធ។

លោកស្រី Stenergard បានព្រមានថា លទ្ធផលនៃកិច្ចចរចារវាងសហរដ្ឋអាមេរិក និងរុស្ស៊ី នឹងមានផលប៉ះពាល់រយៈពេលវែង ដល់សន្តិសុខអឺរ៉ុប។

សេចក្តីថ្លែងការណ៍របស់ពួកគេ បានធ្វើឡើង បន្ទាប់ពីកិច្ចពិភាក្សាបិទទ្វាររវាងរដ្ឋមន្ត្រីការបរទេសអាមេរិក លោក Marco Rubio និងរដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergey Lavrov) នៅទីក្រុង    រីយ៉ាដ (Riyadh) ប្រទេសអារ៉ាប៊ីសាអ៊ូឌីត កាលពីថ្ងៃអង្គារ។