បណ្តាប្រទេសអារ៉ាប់កាលពីថ្ងៃអង្គារ បានស្វាគមន៍កិច្ចប្រឹងប្រែងរបស់អារ៉ាប៊ីសាអ៊ូឌីត ក្នុងការធ្វើជាម្ចាស់ផ្ទះកិច្ចចរចារវាងអាមេរិកនិងរុស្ស៊ីស្តីពីជម្លោះអ៊ុយក្រែន នៅក្រុងរីយ៉ាដ។

ប្រមុខការទូតរបស់ប្រទេសទាំងពីរ បាននិយាយបន្ទាប់ពីកិច្ចចរចារថា រុស្ស៊ី និងអាមេរិក បានព្រមព្រៀងគ្នាក្នុងការចាប់ផ្តើមធ្វើការឆ្ពោះទៅរកការបញ្ចប់ជម្លោះនៅអ៊ុយក្រែន និងធ្វើឲ្យប្រសើរឡើងនូវទំនាក់ទំនងការទូត និងសេដ្ឋកិច្ចរបស់ពួកគេ។

ទីភ្នាក់ងារសារព័ត៌មាន Emirates បានរាយការណ៍ថា ប្រទេសអារ៉ាប់រួម បានសម្តែងក្តីសង្ឃឹមថា កិច្ចពិភាក្សានេះ នឹងដើរតួជាជំហានដ៏សំខាន់មួយ ឆ្ពោះទៅរកការផ្សារភ្ជាប់ភាពខុសគ្នា ជំរុញការទំនាក់ទំនង និងពន្លឿនកិច្ចពិភាក្សា ដើម្បីបញ្ចប់ជម្លោះ ដែលអូសបន្លាយរយៈពេលជិត បីឆ្នាំនេះ»។

ក្រសួងការបរទេសរបស់ខ្លួន បានសរសើរកិច្ចខិតខំប្រឹងប្រែងរបស់ប្រទេសអារ៉ាប៊ីសាអ៊ូឌីត ក្នុងការធ្វើជាម្ចាស់ផ្ទះកិច្ចចរចា «ដែលឆ្លុះបញ្ចាំងពីការប្តេជ្ញាចិត្តរបស់ព្រះរាជាណាចក្រនេះ ក្នុងការគាំទ្រកិច្ចខិតខំប្រឹងប្រែងសន្តិភាពអន្តរជាតិ និងការសម្រេចបាននូវស្ថិរភាព និងវិបុលភាពពិភពលោក»។

ក្រសួងបានបញ្ជាក់ជាថ្មីនូវការប្តេជ្ញាចិត្តរបស់ប្រទេសអារ៉ាប់រួម ក្នុងការគាំទ្រដំណោះស្រាយដោយសន្តិវិធីចំពោះជម្លោះ និងការលើកកម្ពស់កិច្ចសហប្រតិបត្តិការអន្តរជាតិ ក្នុងការដោះស្រាយបញ្ហាប្រឈមជា   សកល។

លោក Majed Al-Ansari អ្នកនាំពាក្យក្រសួងការបរទេសកាតា បានស្វាគមន៍ចំពោះកិច្ចខិតខំប្រឹងប្រែងរបស់អារ៉ាប៊ីសាអ៊ូឌីត ក្នុងដឹកនាំកិច្ចចរចានេះ ដែល«សង្ឃឹមថា នឹងនាំមកនូវសន្តិភាព នៅក្នុងការតស៊ូ  ដែលបានបន្តអស់រយៈពេលជាយូរមកហើយ»។