សមាជិកសភាសហភាពអឺរ៉ុប (EU) កាលពីថ្ងៃអង្គារ (ទី១៨ ខែកុម្ភៈ) បានទាមទារឲ្យអឺរ៉ុប «បង្កើនទ្វេដង» ចំពោះការពង្រឹងវិស័យការពារជាតិរបស់ខ្លួន និងការគាំទ្រដល់អ៊ុយក្រែន បន្ទាប់ពីសហរដ្ឋអាមេរិក បានចាប់ផ្តើមកិច្ចប្រឹងប្រែងជាមួយរុស្ស៊ី ដើម្បីបញ្ឈប់សង្គ្រាម។

សេចក្តីថ្លែងការណ៍ពីបណ្ដាគណបក្សនយោបាយអឺរ៉ុប ដែលមានបក្សប្រជាជនអឺរ៉ុប បក្សសង្គមនិយម និងប្រជាធិបតេយ្យ បក្ស Renew និងបក្ស Greens បានឲ្យដឹងថា៖ «អឺរ៉ុបមិនអាចពឹងផ្អែកទាំងស្រុងលើសហរដ្ឋអាមេរិកបានទៀតទេ ដើម្បីការពារតម្លៃ និងផលប្រយោជន៍រួមរបស់យើង ក្នុងនោះរួមទាំងការបន្តគាំទ្រដល់អធិបតេយ្យភាព និងបូរណភាពទឹកដីរបស់អ៊ុយក្រែនផងដែរ»។

សេចក្ដីថ្លែងការណ៍នោះ បានលើកឡើងទៀតថា៖ «យើងត្រូវតែទទួលស្គាល់ការពិតថ្មីនេះ ហើយបង្កើនទ្វេដងនូវកិច្ចប្រឹងប្រែងរួមគ្នារបស់អឺរ៉ុប ដើម្បីការពារអ៊ុយក្រែន និងសន្តិសុខអឺរ៉ុបទាំងមូល ដោយបង្កើតខែលការពារដ៏គួរឲ្យទុកចិត្ត និងរឹងមាំប្រឆាំងនឹងការលុកលុយណាមួយ»។

គួរបញ្ជាក់ថា ការអំពាវនាវឲ្យមានចំណាត់ការនេះ បានកើតមានឡើងបន្ទាប់ពីមន្រ្តីជាន់ខ្ពស់របស់សហរដ្ឋអាមេរិក បានជួបអ្នកចរចារុស្ស៊ី នៅប្រទេសអារ៉ាប៊ីសាអ៊ូឌីត ដើម្បីចាប់ផ្ដើមបើកកិច្ចពិភាក្សា ស្តីពីការបញ្ចប់សង្រ្គាមរយៈពេល ៣ឆ្នាំរបស់ទីក្រុងមូស្គូ នៅអ៊ុយក្រែន៕