រដ្ឋមន្ត្រីសន្តិសុខប៉ាណាម៉ា កាលពីថ្ងៃអង្គារ (ទី១៨ ខែមករា) បានប្រាប់ឲ្យដឹងថា ជាងពាក់កណ្តាលនៃជនអន្តោប្រវេសន៍ដែលត្រូវបាននិរទេសពីសហរដ្ឋអាមេរិកទៅកាន់ទីតាំងឆ្លងកាត់ប៉ាណាម៉ា ក្នុងរយៈពេលប៉ុន្មានថ្ងៃថ្មីៗនេះ បានទទួលយកការធ្វើមាតុភូមិនិវត្តន៍ដោយស្ម័គ្រចិត្តទៅកាន់ប្រទេសកំណើតរបស់ពួកគេវិញ ដោយភាគច្រើន នៅតំបន់អាស៊ី ឬមជ្ឈិមបូព៌ា។

គួរបញ្ជាក់ថា រដ្ឋបាលរបស់លោកប្រធានាធិបតីអាមេរិក Donald Trump បាននិរទេសជនអន្តោប្រវេសន៍ តាមជើងហោះហើរចំនួន ៣គ្រឿង ដែលជាផ្នែកមួយនៃការបង្ក្រាបលើអ្នករស់នៅដោយខុសច្បាប់ក្នុងប្រទេសរបស់លោក។

រដ្ឋមន្ត្រីសន្តិសុខ លោក Frank Abrego បាននិយាយថា ជនអន្តោប្រវេសន៍ចំនួន ២៩៩នាក់ បានស្នាក់នៅក្នុងសណ្ឋាគារ ក្នុងទីក្រុង Panama ក្រោមការការពាររបស់អាជ្ញាធរមូលដ្ឋាន និងដោយមានការគាំទ្រផ្នែកហិរញ្ញវត្ថុពីសហរដ្ឋអាមេរិក តាមរយៈអង្គការអន្តរជាតិសម្រាប់ទេសន្តរប្រវេសន៍ និងទីភ្នាក់ងារជនភៀសខ្លួនរបស់អង្គការសហប្រជាជាតិ។

លោក Abrego បាននិយាយថា៖ «ថ្ងៃនេះខ្ញុំអាចប្រាប់អ្នកទាំងអស់គ្នាថា ១៧១នាក់ ក្នុងចំណោមពួកគេ (ជនអន្តោប្រវេសន៍) បានយល់ព្រមត្រលប់ទៅវិញដោយស្ម័គ្រចិត្ត»។ លោកបានបន្ថែមថា អ្នកផ្សេងទៀតនឹងចាកចេញជាបណ្តើរៗ នៅពេលដែលអង្គការសហប្រជាជាតិផ្តល់មធ្យោបាយធ្វើដំណើរត្រលប់ទៅវិញដល់ពួកគេ៕