នៅថ្ងៃពុធនេះ សភាវៀតណាម បានអនុម័តផែនការសម្រាប់ការតភ្ជាប់ផ្លូវរថភ្លើងតម្លៃ ៨ពាន់លានដុល្លារ ចេញពីទីក្រុងកំពង់ផែភាគខាងជើងធំបំផុតរបស់ខ្លួនទៅកាន់ព្រំដែនជាមួយប្រទេសចិន ដើម្បីធ្វើឲ្យល្អប្រសើរឡើងការតភ្ជាប់រវាងប្រទេសគ្រប់គ្រងតាមបែបកុម្មុយនិស្តទាំង ២ និងធ្វើឲ្យវិស័យពាណិជ្ជកម្មកាន់តែងាយស្រួលជាងមុន ។

ផ្លូវរថភ្លើងថ្មីនេះ នឹងរត់ឆ្លងកាត់មជ្ឈមណ្ឌលខ្សែសង្វាក់ផលិតកម្មសំខាន់ៗរបស់វៀតណាមដែលជាទីតាំងរបស់ក្រុមហ៊ុន Samsung, Foxconn, Pegatron និងក្រុមហ៊ុនខ្នាតយក្សសកលដទៃជាច្រើនទៀត ដែលភាគច្រើននៃក្រុមហ៊ុនទាំងនេះ ពឹងផ្អែកលំហូរសមាសធាតុទៀងទាត់ពីចិន ។

ផ្លូវរថភ្លើងនេះដែរមានប្រវែង ៣៩០គ.ម ចេញពីទីក្រុងកំពង់ផែ Haiphong ឆ្ពោះទៅកាន់ទីក្រុងតំបន់ភ្នំ Lao Cai ដែលជាប់ព្រំប្រទល់ខេត្ត Yunnan របស់ចិន ហើយនិងរត់ឆ្លងកាត់ទីក្រុងហាណូយផងដែរ ។

ទីភ្នាក់ងារព័ត៌មាន AFP រាយការណ៍ថា ការសាងសង់ផ្លូវរថភ្លើងនេះ ទទួលបានការគាំទ្រ ៩៥ភាគរយពីសមាជិកសភាវៀតណាម ។

ចិននឹងផ្តល់មូលនិធិមួយចំនួនតាមរយៈប្រាក់កម្ចីសម្រាប់គម្រោងដែលត្រូវបានគេរំពឹងថានឹងចំណាយទឹកប្រាក់ជាង ៨ពាន់លានដុល្លារ ។

វាគឺជាផ្លូវរថភ្លើងមួយក្នុងចំណោមផ្លូវរថភ្លើង ២ខែ្ស តភ្ជាប់ទៅកាន់ប្រទេសចិនដែលវៀតណាមមានគម្រោង និងជាផ្នែកមួយនៃគំនិតផ្តួចផ្តើម “ច្រករបៀង ២ ខ្សែក្រវាត់ ១” ដែលជាប់ពាក់ព័ន្ធជាមួយកម្មវិធីហេដ្ឋារចនាសម្ព័ន្ធសកល “ខ្សែក្រវាត់ ១ ផ្លូវ ១”របស់ទីក្រុងប៉េកាំង ៕