និស្សិតជាង ១៥០នាក់ បានរងរបួស នៅក្នុងប្រទេសបង់ក្លាដែស អំឡុងពេលមានការប៉ះទង្គិចគ្នា នៅបរិវេណសាកលវិទ្យាល័យ ដែលជាសញ្ញានៃភាពមិនចុះសម្រុងគ្នាយ៉ាងធ្ងន់ធ្ងររវាងក្រុមដែលពាក់ព័ន្ធក្នុងការបង្កើតបដិវត្តន៍ជាតិ កាលពីឆ្នាំមុន។

ការប៉ះទង្គិចគ្នានៅរសៀលថ្ងៃអង្គារ បានចាប់ផ្តើម បន្ទាប់ពីក្រុមយុវជននៃគណបក្សជាតិនិយមបង់ក្លាដែស (BNP) បានស្វែងរកការជ្រើសរើសនិស្សិត នៅសាកលវិទ្យាល័យវិស្វកម្មនិងបច្ចេកវិទ្យា នៅក្នុងទីក្រុង Khulna នៅភាគនិរតីរបស់ប្រទេសនេះ ។

ការប៉ះទង្គិចនោះ បានជំរុញឲ្យមានការប្រឈមមុខដាក់គ្នាជាមួយសមាជិកនិស្សិតប្រឆាំងនឹងការរើសអើង ជាក្រុមតវ៉ាដឹកនាំការបះបោរ ដែលបានបណ្តេញអតីតនាយករដ្ឋមន្ត្រីផ្តាច់ការ លោក Sheikh Hasina ពីអំណាច កាលពីខែសីហា ឆ្នាំមុន។

មន្ត្រីនគរបាលក្រុង Khulna លោក Kabir Hossain បានប្រាប់សារព៍ត៌មាន AFP ថា មនុស្សយ៉ាងតិច ៥០នាក់ ត្រូវបានបញ្ជូនទៅព្យាបាល បន្ទាប់ពីមានការប៉ះទង្គិចគ្នា។

លោកបានបន្ថែមថា៖«ស្ថានការណ៍ឥឡូវ ស្ថិតនៅក្រោមការគ្រប់គ្រង ហើយនគរបាលជំនួយបន្ថែម ត្រូវបានដាក់ពង្រាយ»។

និស្សិតផ្នែកទំនាក់ទំនងឈ្មោះ Jahidur Rahman បានប្រាប់សារព័ត៌មាន AFP ថា អ្នកដែលសម្រាកព្យាបាលនៅមន្ទីរពេទ្យ មានរបួសពីការគប់ដុំឥដ្ឋ និង «អាវុធមុតស្រួច» ហើយប្រហែល ១០០នាក់ ផ្សេងទៀត បានរងរបួសស្រាល។