អង្គការឃ្លាំមើលសិទ្ធិមនុស្ស បាននិយាយកាលពីថ្ងៃអង្គារថា ទណ្ឌកម្មដែលដាក់លើរបបរបស់អតីតប្រធានាធិបតីស៊ីរី លោក បាសា អាល់អាសាដ ( Bashar al-Assad) ដោយលោកខាងលិច កំពុងធ្វើឲ្យប៉ះពាល់ដល់ការស្តារប្រទេសនេះឡើងវិញ។ 

HRW បន្ថែមថា ទណ្ឌកម្មដែលដាក់ដោយសហរដ្ឋអាមេរិក ចក្រភពអង់គ្លេស សហភាពអឺរ៉ុប និងប្រទេសដទៃទៀត កំពុងរារាំងកិច្ចខិតខំប្រឹងប្រែងកសាងឡើងវិញ និងធ្វើឲ្យកាន់តែធ្ងន់ធ្ងរដល់ការរងទុក្ខរបស់ប្រជាជនស៊ីរីរាប់លាននាក់» ហើយមិនមានយន្តការដកចេញច្បាស់លាស់នោះទេ។

លោក Hiba Zayadin អ្នកស្រាវជ្រាវជាន់ខ្ពស់របស់អង្គការ HRW បាននិយាយថា ប្រទេសនេះ «កំពុងត្រូវការការកសាងឡើងវិញយ៉ាងខ្លាំង ហើយប្រជាជនស៊ីរី កំពុងតស៊ូដើម្បីរស់រានមានជីវិត។ ជាមួយនឹងការដួលរលំនៃអតីតរដ្ឋាភិបាល ការដាក់ទណ្ឌកម្មយ៉ាងទូលំទូលាយ ឥឡូវនេះ គឺជាឧបសគ្គដ៏ធំ ក្នុងការស្ដារសេវាសំខាន់ៗ ដូចជាសេវាថែទាំសុខភាព ទឹក ភ្លើង និងការអប់រំជាដើម»។

HRW បានបន្តថា សង្រ្គាមស៊ីវិលដ៏យូរអង្វែងរបស់ប្រទេសនេះ បានធ្វើឲ្យសេដ្ឋកិច្ច និងហេដ្ឋារចនាសម្ព័ន្ធរបស់ខ្លួន ត្រូវបានបំផ្លិចបំផ្លាញ ដោយមនុស្សរាប់លាននាក់បានភៀសខ្លួន និង ៩០ភាគរយនៃចំនួនប្រជាជនដែលនៅសល់ រស់នៅក្នុងភាពក្រីក្រ។

មនុស្សប្រហែល ១៣លាននាក់ មិនអាចទទួលបានអាហារគ្រប់គ្រាន់ហើយ ១៦.៥ លាននាក់ ពឹងផ្អែកលើជំនួយមនុស្សធម៌។