អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅថ្ងៃពុធ (ទី១៩ ខែកុម្ភៈ) នេះថា ប្រធានាធិបតីរុស្ស៊ី លោក Vladimir Putin និងប្រធានាធិបតីអាមេរិក លោក Donald Trump អាចជួបគ្នាយ៉ាងលឿន នៅខែនេះ ទោះបីជាកិច្ចប្រជុំទល់មុខគ្នានេះ នឹងត្រូវការពេលវេលារៀបចំក៏ដោយ។

លោក Peskov បានប្រាប់ថា កិច្ចពិភាក្សា រវាងសហរដ្ឋអាមេរិក និងរុស្ស៊ី ដែលត្រូវបានធ្វើឡើង កាលពីថ្ងៃអង្គារ (ទី១៨ ខែកុម្ភៈ) ក្នុងទីក្រុងរីយ៉ាដ ប្រទេសអារ៉ាប់ប៊ីសាអ៊ូឌីត គឺជា «ជំហានដ៏សំខាន់បំផុត» ដើម្បីឆ្ពោះទៅរកដំណោះស្រាយពីសង្រ្គាមអ៊ុយក្រែន ដែលមានរយៈជិតដល់ ៣ឆ្នាំហើយ។

លោក Peskov ត្រូវបានដកស្រង់សម្តីដោយប្រព័ន្ធផ្សព្វផ្សាយរដ្ឋ ដែលបាននិយាយថា៖ «បើនិយាយក្នុងន័យធៀប ដើម្បីអនុវត្តនីតិវិធីសង្គ្រោះឡើងវិញនេះ អ្នកការទូតនឹងចាប់ផ្តើមធ្វើការដោយយោងតាមកិច្ចព្រមព្រៀងដែលរដ្ឋមន្ត្រីការបរទេសរុស្ស៊ី លោក Sergei Lavrov បានឈានដល់កាលពីម្សិលមិញជាមួយរដ្ឋមន្ត្រីការបរទេសអាមេរិក លោក Marco Rubio»។

លោកបានបន្ថែមថា៖ «ប៉ុន្តែនេះគឺជាជំហានដំបូង។ តាមធម្មតា វាមិនអាចទៅរួចទេ ក្នុងការជួសជុលអ្វីៗទាំងអស់ ក្នុងរយៈពេលតែ ១ថ្ងៃ ឬ ១សប្តាហ៍នោះ។ នៅមានប្រវែងផ្លូវវែងឆ្ងាយណាស់ដែលត្រូវធ្វើដំណើរ»។

គួរបញ្ជាក់ថា កិច្ចពិភាក្សា នៅទីក្រុងរីយ៉ាដ គឺជាលើកដំបូងហើយ ដែលមន្ត្រីអាមេរិក និងរុស្ស៊ី បានជួបប្រជុំគ្នា ដើម្បីពិភាក្សា អំពីវិធីបញ្ចប់ជម្លោះបង្ហូរឈាមមិនធ្លាប់មាន នៅអឺរ៉ុប គិតចាប់តាំងពីសង្គ្រាមលោកលើកទី២ មក។ គ្មានទាំងមន្ត្រីអ៊ុយក្រែន ឬអឺរ៉ុប ត្រូវបានអញ្ជើញឲ្យចូលរួមនោះទេ។ ទីក្រុងគីវ បាននិយាយថា ខ្លួននឹងមិនទទួលយកកិច្ចព្រមព្រៀងណាមួយ ដែលបានឈានដល់ដោយគ្មានការយល់ព្រមពីខ្លួនជាដាច់ខាត៕