មន្រ្តីមួយរូបរបស់ប៉ាណាម៉ា និយាយកាលពីថ្ងៃអង្គារថា ជនអន្តោប្រវេសន៍យ៉ាងហោច ១៧០នាក់ ដែលភាគច្រើននៃពួកគេមកពីអាស៊ី និងតំបន់មជ្ឈិមបូព៌ា ត្រូវបានបញ្ជូនទៅកាន់ប៉ាណាម៉ាដោយសហរដ្ឋអាមេរិក បានយល់ព្រមដោយស្ម័គ្រចិត្តវិលត្រឡប់ទៅកាន់ប្រទេសកំណើតរបស់ពួកគេវិញ ។

លោក Frank Abrego គឺជារដ្ឋមន្រ្តីសន្តិសុខសាធារណៈប៉ាណាម៉ា និយាយនៅក្នុងសន្និសីទសារព័ត៌មានថា មាននូវដំណើរការមួយអំឡុងសប្តាហ៍នេះ មនុស្សប្រហែល ២០-២៥នាក់ នឹងត្រូវចាកចេញពីប្រទេសរបស់ពួកយើង ហើយដូចអ្វីដែលោកបាននិយាយអញ្ចឹងថា ជនអន្តោប្រវេសន៍ ១៧១នាក់ ក្នុងចំណោមជនអន្តោប្រវេសន៍ ២៩៩នាក់ បានយល់ព្រមរួចទៅហើយក្នុងការវិលត្រឡប់ទៅកាន់ប្រទេសកំណើតរបស់ពួកគេវិញ ។

លោក Abrego និយាយថា ប៉ាណាម៉ា បានទទួលជនអន្តោប្រវេសន៍ ២៩៩នាក់ ក្នុងរយៈពេលប៉ុន្មានថ្ងៃកន្លងមកនេះ ដោយផ្តល់កន្លែងស្នាក់នៅដល់ពួកគេនៅក្នុងសណ្ឋាគារ និងស្ថិតក្រោមការការពារពីក្រុមអាជ្ញាធរប៉ាណាម៉ា ក្នុងនោះការគាំទ្រផ្នែកហិរញ្ញវត្ថុពីសហរដ្ឋអាមេរិក តាមរយៈអង្គការអន្តោប្រវេសន៍អន្តរជាតិ (IOM) និងឧត្តមស្នងការជនភៀសខ្លួនអង្គការសហប្រជាជាតិ(UNHCR) ។

ដោយឡែក ជនអន្តោប្រវេសន៍និរទេសខ្លួនសេសសល់ ត្រៀមចាកចេញបន្តិចម្តងៗ ពេលដែលទីភ្នាក់ងារ UN ផ្តល់សំបុត្រយន្តហោះវិលត្រឡប់ទៅកាន់ប្រទេសរបស់ពួកគេវិញ ៕