ប្រជាពលរដ្ឋរស់នៅតំបន់ភាគខាងត្បូងលីបង់ បានវិលត្រឡប់ទៅកាន់ភូមិដ្ឋានរងការខ្ទេចខ្ទាំរបស់ពួកគេវិញហើយកាលពីថ្ងៃអង្គារម្សិលមិញ និងបានស្វែងរកសាច់ញាតិដែលត្រូវបានសម្លាប់នៅក្នុងសង្រ្គាមកាលពីឆ្នាំមុនរវាងកងទ័ពអ៊ីស្រាអែល និងក្រុមហេសបូឡា ខណៈទាហានអ៊ីស្រាអែល បានដកចេញពីតំបន់ភាគច្រើននៃដែនដីមួយនេះ ។

នៅក្នុងភូមិ Yaroun ដែលជាភូមិខ្សែត្រៀមមុខ ក្រុមការងារសង្រ្កោះ បានទាញសាកសពមនុស្សម្នាក់ចេញពីគំនរអគារបាក់បែក ។

ជម្លោះដែលបានចាប់ផ្តើមឡើងពេលដែលក្រុមហេសបូឡា បើកការវាយប្រហារកាលពីថ្ងៃទី ៨ ខែតុលា ឆ្នាំ ២០២៣ ជាការគាំទ្រសម្ព័ន្ធមិត្តហាម៉ាស់ប៉ាឡេស្ទីន បានធ្វើឲ្យមនុស្សរាប់ម៉ឺននាក់ជម្លៀសខ្លួនចេញពីតំបន់ភាគខាងជើងអ៊ីស្រាអែល ហើយមនុស្សជាង ១លាននាក់ បានជម្លៀសខ្លួនចេញពីតំបន់ភាគខាងត្បូងលីបង់ ។

អ៊ីស្រាអែល បានបញ្ជូនកងកម្លាំងរបស់ខ្លួនចូលទៅកាន់តំបន់ភាគខាងត្បូងលីបង់ អំឡុងការវាយប្រហារតាមជើងគោកដ៏សំខាន់របស់ពួកគេ ប្រឆាំងនឹងក្រុមហេសបូឡា ធ្វើឲ្យវាក្លាយជាចំណុចស្រួចស្រាវបំផុត បង្កឡើងដោយសារសង្រ្គាមនៅតំបន់ហ្កាហ្សា ។

លក្ខខណ្ឌកិច្ចព្រមព្រៀងបទឈប់បាញ់រៀបចំឡើងដោយសហរដ្ឋអាមេរិក តម្រូវឲ្យអ៊ីស្រាអែលដកទ័ពចេញ ហើយនិងរារាំងក្រុមហេសបូឡាពីការមានវត្តមានយោធាណាមួយនៅតំបន់ភាគខាងត្បូងលីបង់ ខណៈកងទ័ពលីបង់គាំទ្រដោយអាមេរិក ត្រូវដាក់ពង្រាយចូលទៅកាន់តំបន់ព្រំដែននោះ ៕