សេវាកម្មទូកដឹកអ្នកដំណើររវាងទីក្រុង Bukavu និងទីក្រុង Goma បានចាប់ផ្តើមឡើងវិញហើយកាលពីថ្ងៃអង្គារម្សិលមិញ ក្រោយផ្អាកអស់មួយរយៈពេល ដើម្បីស្តារការតភ្ជាប់ការដឹកជញ្ជូនដ៏ចាំបាច់ រវាងទីក្រុងទាំង ២ ស្ថិតនៅភាគខាងកើតសាធារណរដ្ឋប្រជាធិបតេយ្យកុងហ្គោ ស្របពេលដែលជម្លោះកំពុងបន្ត ធ្វើឲ្យអាក់ខានដល់ការធ្វើដំណើរ និងពាណិជ្ជកម្ម ។

ការចាប់ផ្តើមដំណើរការឡើងវិញនេះ បានកើតមាន ក្រោយក្រុមឧទ្ទាម M23 ដែលរឹបអូសបានតំបន់ធំៗនៅក្នុងដែនដីមួយនេះនារយៈពេលប៉ុន្មានខែកន្លងមកនេះ រួមទាំងរដ្ឋធានី Goma នោះ បានរុលចូលដល់មជ្ឈមណ្ឌលទីក្រុង Bukavu កាលពីថ្ងៃអាទិត្យកន្លងទៅ ហើយនិងអនុញ្ញាតឲ្យទូកចាកចេញទៅកាន់ទីក្រុង Goma ។

នៅទីក្រុង Goma ការមកដល់ដំបូងរបស់ទូកដឹកអ្នកដំណើរ ទទួលបានការអបអរសាទរយ៉ាងខ្លាំងពីអ្នកស្រុក ដោយពួកគេនាំគ្នាទះដៃ ពេលដែលអ្នកដំណើរចុះពីលើទូក ។

នៅក្នុងចំណោមពួកគេគឺលោក Fabrice Kulimushi គឺជាអ្នកកំប្លែងវ័យ ២៨ឆ្នាំដែលបានរត់ភៀសខ្លួនចេញពីជម្លោះនៅទីក្រុង Goma ទៅកាន់ទីក្រុង Bukavu ហើយមានឱកាសវិលត្រឡប់មកវិញ ។

លោកនិយាយថា លោកពិតជាមានអារម្មណ៍សប្បាយរីករាយខ្លាំងណាស់ ពីព្រោះថា វាមានរយៈជាយូរមកហើយ ។ មនុស្សជាច្រើនបានរងគ្រោះខ្លាំងណាស់ ដោយសារកង្វះខាតការដឹកជញ្ជូនរវាងទីក្រុង Goma និងទីក្រុង Bukavu ។

លោកបន្តថា ពួកយើងបានខកខានការតភ្ជាប់ទីក្រុងទាំង ២នេះ ប៉ុន្តែពេលនេះ ទូកចាប់ផ្តើមធ្វើដំណើរវិញ ហើយអ្វីៗនឹងល្អប្រសើរឡើង ។

អ្នកដំណើរម្នាក់ទៀត គឺអ្នកស្រី Nyota Burashengwa វ័យ ៣០ឆ្នាំ បានធ្វើដំណើរមកកាន់ទីក្រុង Goma សម្រាប់ពិធីបុណ្យសពប្អូនស្រីរបស់គាត់ ដែលបានស្លាប់ពេលឆ្លងទន្លេ ។

អ្នកស្រីនិយាយថា គាត់មានអារម្មណ៍ល្អ ដោយសារប្អូនស្រីរបស់គាត់ដែលបានស្លាប់ ពុំបានបញ្ចុះសាកសពនោះទេ ចាប់តាំងពីគ្រួសារទាំងមូលនៅទីក្រុង Bukavu ។ ដូច្នេះហើយ ពេលពួកយើងដឹងថា សេវាកម្មទូកចាប់ផ្តើមដំណើរការឡើងវិញ ពួកយើងក៏បានសម្រេចចិត្តមក ។ អរគុណព្រះដែលធ្វើឲ្យពួកយើងអាចវិលត្រឡប់មកវិញបាន ៕