រដ្ឋមន្ត្រីការបរទេសរុស្ស៊ី លោក Sergei Lavrov នៅថ្ងៃពុធ (ទី១៩ ខែកុម្ភៈ) នេះ បានពោលសរសើរប្រធានាធិបតីអាមេរិក លោក Donald Trump ដែលបាននិយាយថា ការគាំទ្រពីមុនរបស់សហរដ្ឋអាមេរិក ចំពោះការស្នើរបស់អ៊ុយក្រែន ដើម្បីចូលរួមជាមួយសម្ព័ន្ធមិត្តយោធាណាតូ គឺជាមូលហេតុធំចម្បងនៃសង្គ្រាម នៅអ៊ុយក្រែន។

លោក Trump បាននិយាយថា លោកមើលមិនឃើញផ្លូវដែលរុស្ស៊ីអាចអនុញ្ញាតឲ្យអ៊ុយក្រែនចូលរួមជាមួយអង្គការសន្ធិសញ្ញាអាត្លង់ទិកខាងជើង ឬអង្គការណាតូ (NATO) នោះឡើយ ហើយបានបន្ទោសអតីតប្រធានាធិបតីខាងបក្សប្រជាធិបតេយ្យ គឺលោក Joe Biden ដោយចោទប្រកាន់ថា បានផ្លាស់ប្តូរគោលជំហររបស់សហរដ្ឋអាមេរិក ជុំវិញសមាជិកភាពរបស់អង្គការណាតូ សម្រាប់អ៊ុយក្រែន។

លោក Lavrov បានប្រាប់សមាជិកសភាថា៖ «គាត់ (លោក Trump) គឺជាមនុស្សទី១ ហើយរហូតមកដល់ពេលនេះ តាមគំនិតរបស់ខ្ញុំ ជាមេដឹកនាំលោកខាងលិចតែម្នាក់គត់ ដែលបាននិយាយជាសាធារណៈ និងក្ដែងៗថា មូលហេតុជាឫសគល់នៃស្ថានការណ៍ នៅអ៊ុយក្រែន គឺការមានវិធីសាស្ត្រមិនអៀនខ្មាសរបស់រដ្ឋបាលមុន ដើម្បីទាញអ៊ុយក្រែនចូលទៅក្នុងអង្គការណាតូ»។

លោក Lavrov បានបន្ថែមថា៖ «មិនដែលមានមេដឹកនាំលោកខាងលិចធ្លាប់បាននិយាយយ៉ាងដូច្នេះទេ ប៉ុន្តែគាត់បាននិយាយវាច្រើនដងហើយ។ នេះជាសញ្ញាមួយដែលគាត់យល់ពីជំហររបស់យើង ដែលត្រូវបានធ្វើឡើងដោយលោកប្រធានាធិបតី (Vladimir) Putin»។

គួរបញ្ជាក់ថា ចំពេលមានកិច្ចពិភាក្សាជាមួយសហរដ្ឋអាមេរិក នៅទីក្រុងរីយ៉ាដ ប្រទេសអារ៉ាប៊ូសាអ៊ូឌីត កាលពីថ្ងៃអង្គារ (ទី១៨ ខែកុម្ភៈ) រុស្ស៊ីបានទាមទារឲ្យអង្គការណាតូលុបចោលការសន្យាឆ្នាំ២០០៨ របស់ខ្លួន ដែលថា នៅថ្ងៃណាមួយនឹងផ្តល់ឲ្យអ៊ុយក្រែននូវសមាជិកភាពនៃសម្ព័ន្ធភាពដឹកនាំដោយសហរដ្ឋអាមេរិក ហើយបានច្រានចោលគំនិត ដែលថា កងកម្លាំងសមាជិកណាតូ អាចជាកងរក្សាសន្តិភាព ក្រោមកិច្ចព្រមព្រៀងបទឈប់បាញ់៕