អ្នកបង្កើតគោលនយោបាយអាមេរិក បានសម្ដែងកង្វល់នៅក្នុងកិច្ចប្រជុំមួយ ដែលធ្វើឡើងប្រហែលមួយសប្តាហ៍បន្ទាប់ពីការឡើងកាន់តំណែងថ្ងៃទី២០ ខែមករា របស់លោកប្រធានាធិបតី Donald Trump ថា សំណើគោលនយោបាយដំបូងរបស់ប្រធានាធិបតីរូបនេះ បានធ្វើឱ្យមានការព្រួយបារម្ភនៅធនាគារសហព័ន្ធ អំពីអតិផរណាខ្ពស់ ដោយក្រុមហ៊ុននានាប្រាប់ធនាគារកណ្តាលអាមេរិកនេះថា ជាទូទៅពួកគេរំពឹងថានឹងដំឡើងតម្លៃទំនិញដើម្បីទប់ទល់តម្លៃនៃពន្ធនាំចូល។

អ្នកចូលរួមនៅក្នុងកិច្ចប្រជុំថ្ងៃទី២៨-២៩ ខែមករា របស់ធនាគារកណ្តាលអាមេរិក "ជាទូទៅបានចង្អុលបង្ហាញពីហានិភ័យកើនឡើងចំពោះចក្ខុវិស័យអតិផរណា" ជាជាងហានិភ័យចំពោះទីផ្សារការងារ នេះបើយោងតាមកំណត់ហេតុនៃកិច្ចប្រជុំ ដែលត្រូវបានចេញផ្សាយកាលពីថ្ងៃពុធ (១៩ កុម្ភៈ)។

កំណត់ហេតុនោះបន្តថា ខណៈដែលនៅតែមានជំនឿថាសម្ពាធតម្លៃនឹងធូរស្រាលក្នុងប៉ុន្មានខែខាងមុខ "កត្តាផ្សេងទៀតជាច្រើនត្រូវបានលើកឡើងថាអាចរារាំងដល់ដំណើរការបន្ថយអតិផរណា" រួមទាំងការពិតដែលថា "ទំនាក់ទំនងអាជីវកម្មមួយចំនួន បានបង្ហាញថាក្រុមហ៊ុនពួកគេនឹងព្យាយាមបញ្ជូនផលប៉ះពាល់បន្តទៅឱ្យអ្នកប្រើប្រាស់ ជុំវិញការចំណាយខ្ពស់លើការនាំចូល ដោយសារតែការដំឡើងពន្ធ"។

ភាពមិនច្បាស់លាស់ជុំវិញផែនការរបស់លោក Trump បានបន្ថែមលើភាពស្ទាក់ស្ទើររបស់ធនាគារកណ្ដាល ក្នុងការកាត់បន្ថយអត្រាការប្រាក់បន្ថែមទៀត៕