នៅថ្ងៃព្រហស្បតិ៍នេះ គឺជាខួប១ខែចាប់តាំងពីលោកប្រធានាធិបតីអាមេរិក Donald Trump ត្រឡប់ទៅកាន់សេតវិមានវិញ។ លោកបានធ្វើឲ្យរឿងរ៉ាវជាច្រើនរង្គោះរង្គើ ខណៈលោកកែប្រែរបៀបវារៈរបស់រដ្ឋបាលចាស់ និងផ្លាស់ប្តូរគោលនយោបាយនានារបស់សហរដ្ឋអាមេរិក ដែលនេះបានធ្វើឲ្យមានភាពច្របូកច្របល់រាលដាល នៅជុំវិញប្រទេស និងពិភពលោក។

លោកបានចុះហត្ថលេខាលើក្រឹត្យចំនួន៧០ ក្នុងរយៈពេល៣០ថ្ងៃដំបូងក្នុងតំណែងរបស់លោក ដែលមានចំនួនច្រើនជាងការចុះហត្ថលេខាក្នុងអំឡុងពេលឆ្នាំដំបូងក្នុងតំណែងចុងក្រោយរបស់លោក។ វារួមមានទាំងការផ្អាកកម្មវិធីជំនួយបរទេសដោយផ្នែក ដើម្បីធ្វើឲ្យប្រាកដថាវាស្របទៅតាមគោលនយោបាយរបស់លោក។ នេះបាននាំឱ្យក្រសួងការបរទេស និងទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ ឬហៅកាតត់ USAID បញ្ឈប់កម្មវិធីផ្តល់ជំនួយនៅបរទេសស្ទើរតែទាំងអស់ ហើយរដ្ឋបាលរបស់លោក មានផែនការកាត់បុគ្គលិករបស់ទីភ្នាក់ងារ USAID ប្រមាណ ១ ម៉ឺននាក់។

លោកក៏បានដាក់មហាសេដ្ឋី លោក Elon Musk ឱ្យទទួលបន្ទុកក្រសួងប្រសិទ្ធភាពរដ្ឋាភិបាលរបស់សេតវិមាន ដែលត្រូវបានគេស្គាល់ថា DOGE ។ វាពាក់ព័ន្ធនឹងការកាត់បន្ថយការចំណាយរបស់សហព័ន្ធ ហើយបានកែប្រែយ៉ាងឆាប់រហ័សដើម្បីកាត់បន្ថយការងារ និងការផ្តល់មូលនិធិ។

យុទ្ធនាការរបស់ក្រសួងប្រសិទ្ធភាពរដ្ឋាភិបាលរបស់សេតវិមាន បានបង្កឱ្យមានការតវ៉ាទ្រង់ទ្រាយធំនៅទូទាំងប្រទេស។ ប្រជាជនបានចេញធ្វើបាតុកម្មតាមដងផ្លូវដោយអំពាវនាវឱ្យលោក Musk ចាកចេញពីរដ្ឋាភិបាល។ លោក Trump ក៏បានធ្វើឱ្យទំនាក់ទំនងពាណិជ្ជកម្មពិភពលោកមានអស្ថិរភាព ដោយលោកបានប្រកាសអំពីការដំឡើងពន្ធថ្មីជាបន្តបន្ទាប់ ដែលមួយចំនួនកំណត់គោលដៅលើដៃគូពាណិជ្ជកម្មជិតស្និទ្ធបំផុតរបស់សហរដ្ឋអាមេរិក ហើយនេះបានបង្កឱ្យមានការព្រួយបារម្ភនៅជុំវិញពិភពលោក។