លោកប្រធានាធិបតីអាមេរិក Donald Trump បាននិយាយកាលពីថ្ងៃពុធទី១៩កុម្ភៈសប្ដាហ៍នេះថា លោកមានទំនាក់ទំនងល្អជាមួយប្រធានាធិបតីចិន លោក Xi Jinping។

លោក Trump ក៏បាននិយាយផងដែរថាអាចនឹងមានកិច្ចព្រមព្រៀងពាណិជ្ជកម្មថ្មីមួយរវាងប្រទេសចិន និងសហរដ្ឋអាមេរិក។

ការលើកឡើងបែបនេះ មិនមែនជាលើកទី១ទេ បន្ទាប់ពីលោកបានក្លាយជាប្រធានាធិបតីថ្មីអាមេរិក កាលពីខែមករាឆ្នាំនេះ ។ ជាក់ស្ដែងអំឡុងខែកុម្ភៈនេះ លោក Trump ក៏ធ្លាប់បានធ្វើអត្ថាធិប្បាយដូចគ្នានេះ ទៅកាន់ក្រុមអ្នកសារព័ត៌មាន នៅលើយន្តហោះ Air Force One ផងដែរ។

លោក Donald Trump បាននិយាយថាកាលពីថ្ងៃពុធសប្ដាហ៍នេះដែរថា លោកមានការរំពឹងទុកថា លោកប្រធានាធិបតីចិន Xi Jinping នឹងមកបំពេញទស្សនកិច្ចនៅសហរដ្ឋអាមេរិក តែលោកពុំបានបញ្ជាក់ពីពេលវេលានៃដំណើរនោះទេ។

លោក Trump បានប្រាប់អ្នកសារព័ត៌មាន ថាអាមេរិក និងចិន អាចមានកិច្ចព្រមព្រៀងពាណិជ្ជកម្មថ្មីមួយ។ការសន្ទនាឬ ការប្រាស្រ័យទាក់ទងគ្នាថ្មីៗនេះ រវាងលោក Xi និងលោក Trump ត្រូវគេមើលឃើញថាជាឱកាសសំខាន់មួយដើម្បីកាត់បន្ថយកម្ដៅនៃសង្រ្គាមពាណិជ្ជកម្ម ឬការពន្យាពេលដំឡើងពន្ធ។

មេដឹកនាំមហាអំណាចពិភពលោកទាំងពីរ បានពិភាក្សាគ្នាតាមទូរស័ព្ទ មុនពេលលោក Trumpស្បថចូលកាន់អំណាចកាលពីថ្ងៃទី២០មករា និងបានពិភាក្សាបញ្ហាជាច្រើន រួមទាំងបណ្ដាញសង្គម TikTok ជម្លោះពាណិជ្ជកម្ម និងបញ្ហាកោះតៃវ៉ាន់៕