តាមកាលកំណត់ នៅថ្ងៃទី២០ ខែកុម្ភៈ ឆ្នាំ២០២៥នេះ ក្រសួងការងារ និងបណ្តុះបណ្តាលវិជ្ជាជីវៈ សហការជាមួយរោងចក្រ ហ្វ័រម៉ាត (ខេមបូឌា) ខូ អិលធីឌី ដែលជួបឧបទ្ទវហេតុអគ្គិភ័យ កាលពីកន្លងទៅនេះ បានចាប់ផ្តើមបើកប្រាក់ឈ្នួល និងប្រាក់បំណាច់ផ្សេងៗជូនដល់កម្មករនិយោជិត នៅសាលាខណ្ឌដង្កោ រាជធានីភ្នំពេញ។

កញ្ញា អាន់ នីកា ប្រធានរដ្ឋបាលរោងចក្រ ហ្វ័រម៉ាត បានឲ្យព័ត៌មាន ប៊ីធីវី ដឹងថា ការបើកប្រាក់ជូនកម្មករនិយោជិត ភាគីរោងចក្របានទូទាត់ស្របទៅតាមគោលការណ៍ច្បាប់ស្តីពីការងារ មានដូចជា៖ ប្រាក់ឈ្នួលនៃប្រាក់ខែចុងក្រោយ , ប្រាក់ជួសការឈប់សម្រាប់ប្រចាំឆ្នាំដែលនៅសល់ និងប្រាក់បំណាច់បញ្ចប់កិច្ចសន្យាការងារ។ កញ្ញា បានឲ្យដឹងទៀតថា ក្នុងអំឡុងបើកប្រាក់ទាំងនេះ ទឹកមុខកម្មករនិយោជិតមានភាពសប្បាយរីករាយ ក្នុងការទទួលយក និងគិតអំពីការទូទាត់នេះ ដោយសាររោងចក្រធ្វើទៅតាមគោលការណ៍ច្បាប់ ទោះបីជាថៅកែជួបរឿងអកុសល ប៉ុន្តែថៅកែក៏នៅមានទំនួលខុសត្រូវ និងស្វែងរកដំណោះស្រាយដើម្បីបើកផ្តល់ជូនកម្មករ។

បន្ទាប់ពីទទួលបានប្រាក់គ្រប់ចំនួន កម្មករ កម្មការិនី ដែលមកពីតំបន់ផ្សេងគ្នា បាននិយាយថា ដំណោះស្រាយដែលរោងចក្រ និងក្រសួងការងារដាក់ចេញមកនេះ គឺពិតជាល្អ មិនថាចំពោះរូបគាត់ប៉ុណ្ណោះទេ ពោលគឺគ្រប់កម្មករនិយោជិតផ្សេងៗទៀត ពិតជាសប្បាយរីករាយក្នុងការទទួលយកដំណោះស្រាយទាំងនេះ ពីព្រោះបានមើលឃើញពីការខូចខាតមានសភាពធ្ងន់ធ្ងរ ជាពិសេសកម្មករទាំងអស់នៅរោងចក្រនេះ មានក្តីស្រលាញ់ និងអាណិតដល់ថៅកែរោងចក្រ ដែលតែងស្រលាញ់ និងយកចិត្តទុកដាក់ដល់កម្មករកន្លងមក។

សូមជម្រាបជូនថា ក្នុងកំឡុងការបើកផ្តល់ប្រាក់ឈ្នួល និងប្រាក់បំណាច់ផ្សេងៗជូនដល់កម្មករនិយោជិតនេះ មជ្ឈមណ្ឌលការងារចល័ត នៃទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយក្រុមហ៊ុន សហគ្រាសចំនួនជាង១៤ ដោយផ្តល់ឱកាសការងារចំនួនជិត ៩ពាន់កន្លែង ជូនដល់ដល់កម្មករនិយោតផងដែរ ដែលមាន មន្រ្ដី NEA និងក្រុមហ៊ុន រង់ចាំជួយសម្របសម្រួលដល់ការចុះឈ្មោះ និងសម្ភាសន៍ការងារភ្លាមៗជូនកម្មករនិយោជិត។ សូមបញ្ជាក់ទៀតថា កាលពីថ្ងៃទី១១ ខែកុម្ភៈ ឆ្នាំ២០២៥កន្លងទៅ រោងចក្រ ហ្វ័រម៉ាត (ខេមបូឌា) ខូ អិលធីឌី ជួបឧបទ្ទវហេតុអគ្គិភ័យឆេះរោងចក្រអស់ទាំងស្រុង ដែលមានទីតាំងស្ថិតនៅភូមិអន្លង់គងថ្មី សង្កាត់ព្រៃស ខណ្ឌដង្កោ ក្នុងនោះមានកម្មករនិយោជិតធ្វើការចំនួន ៤៦៦នាក់។

បើតាមក្រសួងការងារ និងបណ្តុះបណ្តាលវិជ្ជាជីវៈ ក្រៅពីការបើកផ្តល់ប្រាក់ឈ្នួល និងប្រាក់បំណាច់ផ្សេងៗ កម្មករនិយោជិតនៅតែអាចប្រើប្រាស់ប័ណ្ណ ប.ស.ស. បានជាធម្មតា រួមមាន ផ្នែកថែទាំសុខភាព ជាពិសេសអត្ថប្រយោជន៍នៅពេលពិនិត្យផ្ទៃពោះ និងសម្រាលកូន៕អត្ថបទ៖ ឈិត បូរ៉ាវី