ទីក្រុងសេអ៊ូល កាលពីថ្ងៃពុធ (ទី១៩ ខែកុម្ភៈ) នេះ បានបញ្ជាក់ថា ទាហានកូរ៉េខាងជើងមានសិទ្ធិទទួលបានសញ្ជាតិកូរ៉េខាងត្បូង បន្ទាប់ពីសារព័ត៌មានមួយ បានចេញផ្សាយបទសម្ភាសន៍ជាមួយទាហានដែលត្រូវបានចាប់ខ្លួន នៅប្រទេសអ៊ុយក្រែន ដែលបាននិយាយថា រូបគេមានគម្រោងស្វែងរកសិទ្ធិជ្រកកោន នៅកូរ៉េខាងត្បូង។

គួរបញ្ជាក់ថា សារព័ត៌មាន Chosun Ilbo នៅទីក្រុងសេអ៊ូល បានចុះផ្សាយបទសម្ភាសន៍ជាមួយទាហានកូរ៉េខាងជើង កាលពីថ្ងៃទី១៩ ខែកុម្ភៈ ដោយពណ៌នាអំពីការប្រយុទ្ធ «ឃោរឃៅ» នៅសមរភូមិជួរមុខ ដែលចារកម្មលោកខាងលិចនិយាយថា ទីក្រុងព្យុងយ៉ាងបានបញ្ជូនទាហានទៅរាប់ពាន់នាក់។

ទាហានដែលសារព័ត៌មាននេះ ហៅឈ្មោះ Ri នៅតែស្ថិតក្នុងការឃុំឃាំងរបស់អ៊ុយក្រែន ហើយកិច្ចសម្ភាសន៍ត្រូវបានធ្វើឡើងពីក្នុងបន្ទប់ដាច់តែឯងនៃមន្ទីរឃុំឃាំងមួយ នៅឯទីតាំងដែលមិនត្រូវបានបង្ហាញឲ្យដឹង។

អ្នកសារព័ត៌មានផ្នែកអន្តរជាតិរបស់សារព័ត៌មាន Chosun បានប្រាប់ទីភ្នាក់ងារសារព័ត៌មាន AFP កាលពីថ្ងៃទី១៩ ខែកុម្ភៈថា កិច្ចសម្ភាសន៍ត្រូវបានរៀបចំឡើងតាមរយៈអាជ្ញាធរអ៊ុយក្រែន ប៉ុន្តែមិនអាចធ្វើអត្ថាធិប្បាយបានឡើយ ជុំវិញថា តើអ្នកទោសត្រូវបានបង្ខិតបង្ខំដែរ ឬអត់។

លោក Ri បានប្រាប់សារព័ត៌មាននេះថា ឥឡូវនេះ រូបលោក «៨០ភាគរយ» បានសម្រេចចិត្តថា លោក «គ្រោងនឹងដាក់ពាក្យសុំឋានៈជាជនភៀសខ្លួន ហើយធ្វើដំណើរទៅកូរ៉េខាងត្បូង»។

ដោយអត្ថាធិប្បាយលើសេចក្ដីរាយការន៍នេះ មន្ត្រីម្នាក់មកពីក្រសួងការបរទេសរបស់ទីក្រុងសេអ៊ូល បានប្រាប់ថា៖ «ទាហានកូរ៉េខាងជើងត្រូវបានចាត់ទុកដោយរដ្ឋធម្មនុញ្ញថា ជាជនជាតិរបស់យើង»។

មន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះរូបនេះ បានបន្ថែមថា៖ «ការគោរពឆន្ទៈសេរីរបស់បុគ្គលទាក់ទងនឹងការធ្វើមាតុភូមិនិវត្តន៍អ្នកទោស ស្របនឹងច្បាប់ និងការអនុវត្តអន្តរជាតិ»៕