នាយករដ្ឋមន្ត្រីក្រិកលោក Kyriakos Mitsotakis បាននិយាយកាលពីយប់ថ្ងៃពុធថា អឺរ៉ុប គួរតែដឹងខ្លួន និងកសាងគោលនយោបាយការពារជាតិរបស់ខ្លួន បន្ទាប់ពីការផ្លាស់ប្តូរយ៉ាងខ្លាំងដោយសហរដ្ឋអាមេរិកជុំវិញអ៊ុយក្រែន និងការអភិវឌ្ឍភូមិសាស្ត្រនយោបាយ ក្នុងប៉ុន្មានខែថ្មីៗនេះ។

ប្រធានាធិបតីអាមេរិកលោក ដូណាល់ ត្រាំ ( Donald Trump) បានគាំទ្រគោលនយោបាយរបស់សហរដ្ឋអាមេរិកស្តីពីសង្រ្គាមអ៊ុយក្រែន ក្នុងសប្តាហ៍នេះ ដោយបានហៅប្រធានាធិបតីអ៊ុយក្រែនលោក វ្ល៉ូឌីមី ហ្សេឡិនស្គី (Volodymyr Zelensky)ថា ជា «ជនផ្តាច់ការ» និងបានបញ្ជាក់ថា ទីក្រុងគីវ បានចាប់ផ្តើមសង្រ្គាមរយៈពេល ៣ឆ្នាំ រវាងអ៊ុយក្រែន និងរុស្ស៊ី។

លោក ត្រាំ បានព្រមានថា លោក ហ្សេឡិនស្គី ត្រូវតែចាត់វិធានការឲ្យបានឆាប់រហ័ស ដើម្បីទទួលបានសន្តិភាព បើមិនដូច្នេះ ប្រថុយនឹងការបាត់បង់ប្រទេសរបស់ខ្លួន ដោយធ្វើឲ្យជម្លោះកាន់តែជ្រៅឡើង រវាងមេដឹកនាំទាំងពីរ ដែលបានធ្វើឲ្យមន្ត្រីអឺរ៉ុបព្រួយបារម្ភ។

សហរដ្ឋអាមេរិក និងរុស្ស៊ី បានបើកកិច្ចចរចាសន្តិភាព នៅប្រទេសអារ៉ាប៊ីសាអ៊ូឌីត ក្នុងសប្តាហ៍នេះ ដោយគ្មានអ៊ុយក្រែន ដែលធ្វើឲ្យទីក្រុងគីវ និងសម្ព័ន្ធមិត្តអឺរ៉ុបរបស់ខ្លួន ភ្ញាក់ផ្អើល។

អ៊ុយក្រែនបាននិយាយថា ខ្លួននឹងមិនទទួលយកកិច្ចព្រមព្រៀង ដែលដាក់លើខ្លួន ដោយគ្មានការយល់ព្រមពីខ្លួន ដែលមេដឹកនាំអឺរ៉ុប បានបញ្ជាក់ម្តងហើយម្តងទៀតនោះ ខណៈដែលរុស្ស៊ី បានច្រានចោលការប្រគល់ទឹកដី ដែលខ្លួនបានឈ្នះ។