នៅថ្ងៃព្រហស្បតិ៍នេះ ក្រុមហាម៉ាស់ បានប្រគល់សាកសពចំណាប់ថ្នូរអ៊ីស្រាអែល ៤នាក់ ដល់គណៈកម្មាធិការកាកបាទក្រហមអន្តរជាតិ(ICRC)នៅទីក្រុង Khan Younis ស្ថិតក្នុងតំបន់ហ្កាហ្សាស្រ្ទីប ។

 អ្នកតំណាង ICRC បានចុះហត្ថលេខាលើឯកសារជាមួយយុទ្ធជនហាម៉ាស់បិទមុខម្នាក់នៅលើវេទិកាដែលត្រូវបានរៀបចំឡើងសម្រាប់ការប្រគល់សាកសព ។

 ពួកគេនិយាយថា សាកសពនេះ រួមមានទាំងចំណាប់ថ្នូរក្មេងបំផុត គឺជាទារក និងបងប្រុសអាយុ ៤ឆ្នាំដែលត្រូវបានចាប់ខ្លួនដោយក្រុមហាម៉ាស់កាលពីថ្ងៃទី ៧ ខែតុលា ឆ្នាំ ២០២៣ ។

 ការប្រគល់សាកសពនៅថ្ងៃព្រហស្បតិ៍នេះដែរ បានកើតមានឡើងស្ថិតក្រោមកិច្ចព្រមព្រៀងបទឈប់បាញ់ហ្កាហ្សា ដែលបានឈានដល់កាលពីខែមុន ដោយមានការគាំទ្រពីសហរដ្ឋអាមេរិក និងការសម្របសម្រួលពីប្រទេសកាតា និងប្រទេសអេហ្ស៊ីប ។

 សូមបញ្ជាក់ថា បទឈប់បាញ់ដ៏ផុយស្រួយនៅដែនដីហ្កាហ្សា បានអនុញ្ញាតឲ្យជនភៀសខ្លួនជាច្រើនក្នុងចំណោមពលរដ្ឋ ១,៩លាននាក់ ត្រឡប់ទៅតំបន់ដែលពួកគេបានភៀសខ្លួនវិញ ហើយក៏បានបន្ធូរបន្ថយភាពតានតឹងខ្លះនៅភាគខាងត្បូង និងកណ្តាលនៃតំបន់ហ្កាហ្សា ប៉ុន្តែដែនដីឡោមព័ទ្ធមួយនេះនៅតែត្រូវការជាបន្ទាន់នូវវិធីសាស្រ្តមនុស្សធម៌ដែលមានប្រសិទ្ធភាពជាងមុន ដើម្បីបន្ធូរបន្ថយទុក្ខវេទនារបស់ជនប៉ាឡេស្ទីន ៕