អ្នកនាំពាក្យក្រសួងពាណិជ្ជកម្ម នៅថ្ងៃព្រហស្បតិ៍ (ទី២០ ខែកុម្ភៈ) នេះ បានប្រាប់ឲ្យដឹងថា ប្រទេសចិនបាន និងកំពុង «ប្រឹងប្រែងឲ្យអស់ពីលទ្ធភាព» ដើម្បីជំរុញឲ្យមានការចរចាជាមួយសហភាពអឺរ៉ុប (EU) ជុំវិញការដំឡើងពន្ធរបស់ប្លុកនេះ លើរថយន្តអគ្គិសនីដែលផលិតដោយចិន ពោលគឺរយៈពេលជិត ៤ខែបន្ទាប់ពីបម្រាមរឹតបន្តឹងលើការនាំចូលនេះបានចូលជាធរមាន។

គួររំលឹកថា EU បានបោះឆ្នោតដំឡើងពន្ធរហូតដល់ទៅ ៤៥,៣ភាគរយ កាលពីខែតុលាឆ្នាំមុន បន្ទាប់ពីគណៈកម្មការអឺរ៉ុបដែលត្រួតពិនិត្យគោលនយោបាយពាណិជ្ជកម្មរបស់ EU បានបើកការស៊ើបអង្កេតប្រឆាំងនឹងការឧបត្ថម្ភធន ពាក់ព័ន្ធនឹងថា តើក្រុមហ៊ុនចិនទទួលបានអត្ថប្រយោជន៍ពីជំនួយអនុគ្រោះ និងហិរញ្ញប្បទាន ក៏ដូចជាដីធ្លី អាគុយ និងវត្ថុធាតុដើម ក្នុងតម្លៃទាបជាងទីផ្សារដែរ ឬទេ។

អ្នកនាំពាក្យក្រសួង លោក He Yadong បាននិយាយថា៖ «ចិនបាន និងកំពុងប្រឹងប្រែងឲ្យអស់ពីលទ្ធភាព ដើម្បីជំរុញឲ្យមានការចរចាជាមួយ EU។ មិនមានក្ដីសង្ឃឹមនោះឡើយ ដែលថា EU នឹងយកចិត្តទុកដាក់ដល់ការអំពាវនាវពីឧស្សាហកម្ម និងជំរុញកិច្ចសហប្រតិបត្តិការវិនិយោគទ្វេភាគី តាមរយៈការសន្ទនា និងការពិគ្រោះយោបល់»។

ប្រទេសចិន បានចាប់ផ្តើមការស៊ើបអង្កេតផ្ទាល់ខ្លួន កាលពីឆ្នាំមុន លើការនាំចូលផលិតផលម៉ាកយីហោ ទឹកដោះគោ និងសាច់ជ្រូករបស់ EU។ ហើយនៅពេលដែលត្រូវបានសួរថា តើករណីទាំងនោះដំណើរការយ៉ាងដូចម្តេច លោក He បានប្រាប់អ្នកសារព័ត៌មានថា ការស៊ើបអង្កេតរបស់ប្រទេសចិន ចំពោះការលក់បន្ទាបតម្លៃលើផលិតផលសាច់ជ្រូករបស់អឺរ៉ុប និងការស៊ើបអង្កេតលើការឧបត្ថម្ភធន ជុំវិញពាណិជ្ជកម្មទឹកដោះគោរបស់ប្លុកដែលមានសមាជិក ២៧ប្រទេស នៅតែប្រព្រឹត្តទៅ៕