លោកប្រធានាធិបតី អេម៉ានុយអែល ម៉ាក្រុង (Emmanuel Macron) បាននិយាយកាលពីថ្ងៃពុធថា ប្រទេសបារាំង និងសម្ព័ន្ធមិត្ត បានយល់ព្រមលើសិទ្ធិរបស់អ៊ុយក្រែន និងកង្វល់សន្តិសុខអឺរ៉ុប គួរតែត្រូវបានយកមកពិចារណា នៅក្នុងកិច្ចព្រមព្រៀងណាមួយ ដើម្បីបញ្ចប់សង្រ្គាមជាមួយរុស្ស៊ី មុនពេលដែលលោកធ្វើដំណើរទៅកាន់ទីក្រុងវ៉ាស៊ីនតោន នៅសប្តាហ៍ក្រោយ។

លោក Macron បាននិយាយនៅលើបណ្តាញសង្គម X បន្ទាប់ពីកិច្ចប្រជុំជាមួយមេដឹកនាំនៃប្រទេសចំនួន ១៩ ភាគច្រើននៅអឺរ៉ុប ដោយភាគច្រើនចូលរួមតាមរយៈតំណភ្ជាប់វីដេអូ ថា៖« ជំហររបស់បារាំង និងសម្ព័ន្ធមិត្តគឺច្បាស់លាស់ និងឯកភាព។ យើងប្រាថ្នាចង់បានសន្តិភាពនៅអ៊ុយក្រែនដែលយូរអង្វែង»។  

ប្រធានាធិបតីអាមេរិកលោក ដូណាល់ ត្រាំ (Donald Trump) បានធ្វើឲ្យសហភាពអឺរ៉ុប មានការភ្ញាក់ផ្អើល ដោយនិយាយថា លោកត្រៀមខ្លួនជាស្រេច ក្នុងការបន្តទំនាក់ទំនងការទូតជាមួយលោក លោក វ្ល៉ាឌីមៀ ពូទីន (Vladimir Putin) បន្ទាប់ពីរយៈពេលបីឆ្នាំនៃសង្គ្រាមរបស់រុស្ស៊ីប្រឆាំងនឹងអ៊ុយក្រែន ដោយពុំមានការពិគ្រោះយោបល់ជាមួយបណ្តាប្រទេសអឺរ៉ុប និងទីក្រុងគីវ។

លោក ម៉ាក្រុង បានបើកកិច្ចប្រជុំនៅរសៀលថ្ងៃពុធ នៅអ៊ុយក្រែន ក្នុងគោលបំណងសម្របសម្រួលការឆ្លើយតបរបស់អឺរ៉ុប ចំពោះអ្វីដែលលោកបានហៅថា ជា «ការគំរាមកំហែងដែលមានស្រាប់» ពីប្រទេសរុស្ស៊ី បន្ទាប់ពីការផ្លាស់ប្តូរគោលនយោបាយដ៏គួរឲ្យភ្ញាក់ផ្អើលរបស់សហរដ្ឋអាមេរិក។