នៅក្នុងបទសម្ភាសន៍តាមវិទ្យុដែលត្រូវបានចាក់ផ្សាយ នៅថ្ងៃព្រហស្បតិ៍ (ទី២០ ខែកុម្ភៈ) នេះ អធិការបតីអាល្លឺម៉ង់ លោក Olaf Scholz បានសង្កត់ធ្ងន់ពីសារៈសំខាន់នៃការបន្តបើកផ្លូវ ដើម្បីឲ្យប្រទេសអ៊ុយក្រែនចូលរួមជាមួយសហភាពអឺរ៉ុប (EU) និងបានច្រានចោលការលើកឡើង ដែលថា ប្រទេសនេះត្រូវទទួលខុសត្រូវ ចំពោះការនាំឲ្យមានការលុកលុយរបស់រុស្ស៊ី។

នៅពេលត្រូវបានសួរថា តើលោកយល់ស្របជាមួយនឹងទស្សនៈរបស់ប្រធានាធិបតីអាមេរិក លោក Donald Trump ពោលគឺជាអ្វីស្របតាមប្រធានាធិបតីរុស្ស៊ីលោក Vladimir Putin ដែលថា អ៊ុយក្រែនត្រូវបានស្តីបន្ទោស សម្រាប់សង្រ្គាមដែលកំពុងបន្តមានដែរ ឬយ៉ាងណា លោក Scholz បានប្រាប់ប្រព័ន្ធផ្សព្វផ្សាយសាធារណៈ ARD ថា៖ «វាមិនមែនបែបនោះទេ។ នៅអឺរ៉ុប ពួកយើងលើកឡើងដដែលៗពីរឿងនេះ»។

លោកបានបន្ថែមថា សម្រាប់ស្ថានភាពបច្ចុប្បន្ន EU កំពុងបន្តបើកទ្វារចំហ សម្រាប់អ៊ុយក្រែន ក្នុងនាមជាសមាជិកអនាគតរបស់ប្លុក។ លោកបានបន្ថែមថា៖ «អ៊ុយក្រែនមិនត្រូវមានឧបសគ្គ សម្រាប់ការសម្រេចចិត្ត ក្នុងនាមជាប្រទេសប្រជាធិបតេយ្យ និងអធិបតេយ្យភាព នៅលើផ្លូវរបស់ខ្លួនឆ្ពោះទៅកាន់អឺរ៉ុបឡើយ»។

ពាក់ព័ន្ធនឹងករណីមានដំណោះស្រាយសន្តិភាព នាពេលអនាគត លោក Scholz បានប្រាប់ថា៖ «អ៊ុយក្រែនត្រូវតែមានកងទ័ពដ៏រឹងមាំមួយ ដែលពួកយើងនៅអឺរ៉ុប និងដៃគូអន្តរជាតិ និងអន្តរអាត្លង់ទិករបស់យើង រួមគ្នាទទួលខុសត្រូវ»។

គួរបញ្ជាក់ថា អឺរ៉ុបកំពុងព្យាយាមស្វែងរកការឆ្លើយតបយ៉ាងរហ័ស និងបន្ទាន់ ចំពោះគោលនយោបាយរបស់លោក Trump ពាក់ព័ន្ធនឹងសង្រ្គាមនេះ បន្ទាប់ពីកិច្ចចរចាកម្រិតខ្ពស់ រវាងសហរដ្ឋអាមេរិក និងរុស្ស៊ីបានផាត់អ៊ុយក្រែន និងអ្នកគាំទ្រអឺរ៉ុបរបស់ប្រទេសនេះចោល ដោយធ្វើឲ្យក្ដីបារម្ភមានខ្លាំងៗឡើង ដែលថា មេដឹកនាំសហរដ្ឋអាមេរិកអាចផ្តល់សម្បទានដល់ទីក្រុងមូស្គូ ជាថ្នូរនឹងការបញ្ចប់សង្រ្គាមនេះ៕